Keleste jas kásipker úıiniń aýlasynda sýbtropıkalyq jemis ósirýdi qolǵa aldy

KELES. QazAqparat - Túrkistan oblysy Keles aýdanynyń turǵyny Aıbek Sarıbaev memlekettik baǵdarlamany paıdalanyp, kópten beri oıynda júrgen bıznes josparyn júzege asyrdy, dep habarlaıdy QazAqparat.

Óńirlik kommýnıkatsııalar qyzmetiniń málimetinshe, aýyl turǵyny «Bastaý bıznes» baǵdarlamasy boıynsha oqyp, sertıfıkat alǵan. Sosyn jas kásipkerlerge qoldaý retinde beriletin 505 000 teńge qarjylaı grantty ıelendi.

Sol aqshaǵa anar jemisiniń dashka bad, qýva atty sorttarynyń 80 túp kóshetin satyp alǵan. Jas baǵban bul kóshetterdi óziniń úıiniń aýlasyndaǵy 10 sottyq jerge otyrǵyzǵan.

Byltyr egilgen kóshetterinen bıyl alǵashqy ónimin alyp otyr.

«Bul jemistiń kóshetterin Ózbekstan Respýblıkasy Ferǵana oblysynan alyp keldim. Birinshi jyly árbir túbi 2-3 dana ónim berse, bıyl 5-6 keliden ónim berýde. Bul sýbtropıkalyq jemistiń basqalarynan ereksheligi - qunyn joǵaltpaıdy jáne kóktem mezgiline deıin sapasyn joǵaltpaı saqtaýǵa bolady. 3-4 jyldan keıin jemis aǵashtarynyń ár túbi 50 kelige deıin ónim beretin bolady», – dedi kásipker A.Sarıbaev.

Aıta keteıik, Ózbekstan Respýblıkasynyń týmasy A.Sarıbaev atamekenine qonys aýdaryp, osynda kásip bastaýdy bala kúninen armandaǵan.

Ol sol armanynyń oryndalýyna kásipkerlikti qoldaýǵa arnalǵan memlekettik baǵdarlamanyń kómegi kóp tıgenin jasyrmady.