Keleste parasporttan álemdi baǵyndyrǵan chempıon jigit turady

KELES. QazAqparat - Keles aýdanynyń turǵyny Dáýren Narybekovtyń chempıon ekenin kópshilik jerlesteri bile bermeıdi. Bos ýaqytynda dıqanshylyqpen aınalysyp, aýyl mektebinde balalardy sportqa baýlyp júrgen oǵan zamandastary jaı jattyqtyrýshy dep qaraıdy. Al, Dáýren - jeńil atletıkadan paralımpıada oıyndarynda álemdi baǵyndyrǵan jigit.

Dáýren Jaqsybaıuly - Shardara aýdanynyń týmasy. Keıin Keles aýdanyna qonys aýdarǵan.

Jastaıynan sportqa qyzyǵyp ósken ol kúrespen aınalysty. «Bolashaqta balýan atanamyn» degen asqaq armany bolatyn.

Degenmen 2000 jyly bolǵan oqıǵa ómirin kúrt ózgertti. Esik aldynda turǵan asaý attan qulap, albyrt jastyqpen jazym basty.

«Sol qolymdy syndyryp aldym. 22 kún es-tússiz komada jattym. Qanshama synyqshyǵa bardyq. Aýrýhanalardy araladyq. Eki jylda birneshe ota jasaldy. Biraq nátıje joq. Qol qısyq bitti. Keıin dárigerler qoldaǵy súıektiń jartysyn alyp tastady» - deıdi ol.

Taǵdyrdyń synaǵy órimdeı jasty qatty kúızeltti. Bolashaǵyn oılaýdan qoryqqan kezderi de boldy. Kúızelis kópke sozyldy.

Degenmen, er jigittiń qoly synǵanmen, rýhy synbady. «Chempıon bolamyn» degen bala kúngi armanyna qol jetkizý úshin jeńil atletıka boıynsha jattyǵý jasaı bastady.

«Parasportqa 2005 jyly keldim. Qazir sportta júrgenime 17 jyl boldy. Osy aralyqta 2 dúrkin el chempıony atandym. Qazaqstan Respýblıkasynyń halyqaralyq dárejedegi sport sheberi boldym. 2011 jyly elimizde ótken qysqy Azııa oıyndarynyń alaýyn ustaý baqyty buıyrdy. 2012 jyldan bastap shetelge shyǵa bastadym. Birikken Arab Ámirlikterinde, Frantsııada, Koreıada ótken jarystardan júldeli oryndardy ıelendim» - deıdi ol.

Dáýren Jaqsybaıuly 2000 shaqyrymǵa júgirý, uzyndyqqa sekirý naıza laqtyrý sekildi jarystardan aldyna jan salmaıdy.

Ońtústik Koreıa, Frantsııa, Gollandııa syndy memleketterde múgedekter arasynda jeńil atletıkadan ótken Álem birinshilikterinde baq synaǵan.

Al, BAƏ-niń Dýbaı qalasynda ótken týrnırde uzyndyqqa sekirýden qola medal ıelengen.

Keıingi paralımpıadada qoldan jasalǵan kedergilerden jarysqa konkýrstan tys qatysypty.

Jınaǵan upaıyn esepke almaǵan soń ishteı renjip, birshama ýaqyt sporttan qol úzgen.

«Bıylǵy jarysqa qatyssam degen josparym bar. Sebebi myqtylyǵymdy dáleldeýim kerek. Qazir jattyǵý jasap, úzbeı daıyndalyp jatyrmyn», - deıdi ol.

Búgingi kúni Dáýren Narybekov «Saýran» sport klýbynda nusqaýshy ári sportshy qyzmetin atqarady.

30-dan astam jas sportshynyń juldyzyn jaǵý jolynda eńbek etip júr. Bos ýaqytynda dıqanshylyqpen aınalysady. Jubaıymen eki ul, eki qyz ósirip otyr.