Keleste kúndelikti tutynatyn azyq-túlik baǵasyn turaqtandyrý sharalary júrip jatyr

KELES. QazAqparat – Túrkistan oblysy Keles aýdanynda kúndelikti tutynatyn azyq-túlik baǵasyn turaqtandyrý sharalary júrgizilýde. Osy maqsatta aýdan ákiminiń orynbasary Abaı Jańbyrbaev bastaǵan jumysshy top aýdan ortalyǵyndaǵy saýda keshenderinde bolyp, eń qajetti taýarlardyń baǵasyna taldaý jasady, dep habarlaıdy QazAqparat tilshisi.

Jergilikti bılik ókilderi aýdandaǵy naýbaıhanalarda bolyp, nannyń sapasy men tazalyǵyna tekserdi. Jumysshy toptyń músheleri ortalyq bazar qasyndaǵy naýbaıhanada tazalyqtyń saqtalmaıtynyn anyqtap, ol boıynsha tıisti hattamalar túzdi. Naýbaıhana qojaıynyna eskertý berildi.

Baǵany baqylaý barysynda turǵyndar da nan satatyn kásipkerlerdiń gıgıenalyq talaptardy oryndamaıtynyn aıtyp, shaǵymdandy. Bul shaǵymdar boıynsha da arnaıy mekeme ókili kásipkerge eskertý berip, aldaǵy ýaqytta kemshilikti joıý kerektigin atap ótti. Joımaǵan jaǵdaıda zań talaptaryna sáıkes jaýapqa tartylatynyn jetkizdi.

Jumysshy top bul kúni sondaı-aq, aýdan ortalyǵyndaǵy bazardy da aralap shyqty. Ondaǵy satylyp jatqan un ónimderi men kúrish, kartop, sábiz, jýa, sary maı, et, sút taýarlarynyń baǵasyna taldaý jasady. Atalǵan ónimderdi baqylaý barysynda keıbir azyq-túlik ónimderiniń baǵasy tym qymbat satylyp jatqany anyqtalyp, tıisti qulaqqaǵys jasaldy. Saýdagerlerge mundaı tekserý turaqty túrde júrgizilip turatyny eskertildi.