Kelesi jyly UBT tapsyrýda ózgerister bolady

NUR-SULTAN. QazAqparat – Keler jyldan bastap UBT tapsyratyn talapkerlerge «Qazaqstan tarıhy» páni boıynsha 5 test tapsyrmasy qosalady. Osylaısha, 2023 jyly mektep bitirýshiler atalǵan pánnen 20 tapsyrma oryndaıdy. Engizilgeli otyrǵan ózgeris týraly habarlama Ulttyq testileý oralyǵynyń resmı Telegram arnasynda jarııalandy, dep habarlaıdy QazAqparat tilshisi.

«Bıyl túlekterdiń jáne sarapshylardyń pikirin eskere otyryp, «Qazaqstan tarıhy» jáne «Oqý saýattylyǵy» pánderi boıynsha ózgerister engizildi.

Kelesi jyldan bastap UBT tapsyratyn talapkerlerdiń bilimin tereń baǵalaý maqsatynda «Qazaqstan tarıhy» pániniń bir nusqasynda 20 test tapsyrmasy (20 ball) bolady. Onda 1-den 10-ǵa deıin bir durys jaýapty nusqasy bar test tapsyrmalary, al 11-den 20-ǵa deıin kontekstke negizdelgen tapsyrmalar (5 suraqtan 2 kontekstik mátin) engiziledi.

«Oqý saýattylyǵy» test tapsyrmalarynyń sany men formasy da ózgeredi. Endi talapkerlerge 3 mátin boıynsha 15 test suraǵy (15 ball) beriledi», - delingen habarlamada.

Ulttyq testileý ortalyǵynyń dereginshe, kelesi jyly bir durys jaýaby bar test tapsyrmalaryndaǵy nusqalar sany 5-ten 4-ke deıin qysqarady. Al bir nemese birneshe durys jaýaby bar test tapsyrmalaryndaǵy nusqalar 8-den 6-ǵa deıin azaıady.