Kelesi jyly respýblıkalyq bıýdjet kirisi artady – mınıstr

ASTANA. QazAqparat – QR Ulttyq ekonomıka mınıstri Álibek Qýantyrov respýblıkalyq bıýdjettiń kirisi men shyǵysy týraly boljamyn aıtty, dep habarlaıdy QazAqparat tilshisi.

Aıta keteıik, Parlament Májilisinde «2023 – 2025 jyldarǵa arnalǵan respýblıkalyq bıýdjet týraly» Qazaqstan Respýblıkasy zańynyń jobasy qaralyp jatyr.

«Respýblıkalyq bıýdjet pen Ulttyq qordyń josparly jyldarǵa arnalǵan parametrlerin qalyptastyrý kezinde Memleket basshysynyń únemdi jáne jaýapty bıýdjet saıasaty tujyrymdamasyn qamtamasyz etý boıynsha qoıǵan mindetteri oryndaldy. 2023-2025 jyldarǵa arnalǵan respýblıkalyq bıýdjet parametrleri bıýdjet saıasatynyń kiris bazasyn tolyqtyrýdyń jańa kózderin jınaqtaý jáne bıýdjet shyǵystaryn áleýmettik-ekonomıkalyq damýdyń basym baǵyttaryna shoǵyrlandyrý baǵdaryn eskere otyryp jasaldy», - dedi Ulttyq ekonomıka mınıstri Májilistiń jalpy otyrysynda.

Onyń boljaýynsha, respýblıkalyq bıýdjet kiristeri 2023 jyly bıylǵy naqtylanǵan josparynan 37%-ǵa artady.

Respýblıkalyq bıýdjetke qosymsha túsimder kiris bazasyn keńeıtý jáne salyqtyq ákimshilendirýdi jaqsartý, sondaı-aq kóleńkeli ekonomıkanyń úlesin azaıtý boıynsha Úkimet qabyldap jatqan sharalar esebinen qamtamasyz etiledi.

«Al respýblıkalyq bıýdjet shyǵystary 2023 jylǵy 21 trln teńgeden 2025 jyly 22,7 trln teńgege deıin birtindep ulǵaıady dep boljanyp otyr. Jalpy ishki ónimge qatysty olardyń 2023 jyly 17,4%-dan 2024-2025 jyldary 16%-ǵa deıin tómendeýi boljanady», - dedi mınıstr.

Buǵan deıin Ulttyq ekonomıka mınıstri 2027 jylǵa deıingi munaı baǵasy, ınflıatsııa, eksport baǵalary men jalpy ishki ónim kólemine boljamdaryn aıtqan edi.