Kelesi jyly Memleket basshysynyń tapsyrmalaryn iske asyrýǵa baǵyttalǵan 8 zań jobasy ázirlenedi - Ádilet mınıstri

ASTANA. 29 qazan. QazAqparat - Kelesi jyly Memleket basshysynyń tapsyrmalaryn iske asyrýǵa baǵyttalǵan 8 zań jobasy ázirlenedi. Bul týraly búgin Úkimet otyrysynda «Úkimettiń zań jobalaý jumystarynyń 2014 jylǵa arnalǵan jospary týraly» baıandama jasaǵan QR Ádilet mınıstri Berik Imashev málim etti.

«Jospar jobasynda 37 zań jobasyn ázirleý kózdelgen, bul 2013 jylmen salystyrǵanda 30 paıyzǵa az»,- dedi ol. Mınıstrdiń atap ótýinshe, Ekonomıka jáne bıýdjettik josparlaý mınıstrligi 10 zań jobasyn, Ádilet, Indýstrııa jáne jańa tehnologııalar mınıstrlikteri bes-besten zań jobasyn, Óńirlik damý mınıstrligi 4 zań jobasyn, Eńbek jáne halyqty áleýmettik qorǵaý, Syrtqy ister, Aýyl sharýashylyǵy, Qorshaǵan ortany qorǵaý, Qarjy mınıstrlikteri eki-ekiden, Qorǵanys, Bilim jáne ǵylym mınıstrlikteri, sondaı-aq Tabıǵı monopolııalardy retteý agenttigi 1 zań jobasyn ázirleıtin bolady. «Sonymen qatar, Jospar jobasyna engizilgen 8 zań jobasy Memleket basshysynyń tapsyrmalaryn iske asyrýǵa baǵyttalǵanyn atap kórsetemin. Bul «jasyl ekonomıkaǵa» kóshý, bilim jáne ǵylym, qymbat metaldar aınalymyn retteý, áleýmettik sala, halyqaralyq kómek máseleleri boıynsha zań jobalary», - dedi B.Imashev.