Kelesi jyldan bastap balabaqsha tárbıeshileriniń, muǵalimderdiń jalaqysy ósedi

NUR-SULTAN. QazAqparat - 2023 jylǵy 1 qańtardan bastap balabaqsha tárbıeshileriniń, mektepter men kolledjder muǵalimderiniń, sondaı-aq qosymsha bilim berý júıesi mamandarynyń jalaqysy taǵy 25%-ǵa ósedi. Bul týraly QazAqparat Oqý-aǵartý mınıstrligine silteme jasap habarlaıdy.

Memleket basshysynyń tapsyrmasy boıynsha muǵalimderdiń jalaqysy 2020 jylǵy qańtardan bastap jyl saıyn 25%-ǵa artyp, 2022 jylǵy qańtarda taǵy 25%-ǵa ósken bolatyn. Osylaısha muǵalimderdiń jalaqysy eki ese ósti.

«Prezıdent Qasym-Jomart Toqaevtyń qoldaýynyń arqasynda muǵalimder jalaqysynyń jyl saıyn kóterilýi oń nátıje berip otyr. Muǵalim mamandyǵyna mektepti úzdik bitirgen túlekter kele bastady. Talapkerlerdiń UBT-daǵy ortasha baly aıtarlyqtaı ósip, pedagogıkalyq mamandyqtarǵa túsetin «Altyn belgi» ıegerleriniń sany birneshe ese kóbeıdi. 2023 jylǵy qańtardan bastap muǵalimderdiń jalaqysy taǵy 25%-ǵa ósedi. Sonymen qatar muǵalimder alatyn jalaqyǵa qosymsha tólemder belgilenedi. Bul – biliktilik sanaty úshin (laýazymdyq jalaqynyń 30%-dan 50%-ǵa deıin), magıstr dárejesi úshin, sabaqtardy aǵylshyn tilinde júrgizgeni, dápterlerdi teksergeni, synyp jetekshiligi jáne tálimgerligi úshin qosymsha tólemder», – dep túsindirdi QR Oqý-aǵartý mınıstrliginiń Qarjy jáne bıýdjetti josparlaý departamentiniń dırektory Ǵalymjan Moldash.

Muǵalimderdiń jalaqysy oqý júktemesine, bilim deńgeıine, biliktiligine, jumys ótiline, magıstr dárejesine jáne basqa da qosymsha tólemderge baılanysty esepteletinin aıta keteıik. Dene shynyqtyrý muǵalimderine sabaqtan keıin qosymsha sport sektsııalaryn ótkizgeni úshin aı saıyn qosymsha aqy tólenetinin de esterińizge salamyz.