Kelesi jyldan bastap áskerge tirkeý tártibi ózgermek

NUR-SULTAN. QazAqparat – 2023 jyldan bastap «Áskerge tirkeý bıleti» qoldanystan alynady. QR Qorǵanys mınıstriniń orynbasary Darhan Ahmedıev Ortalyq kommýnıkatsııalar qyzmetinde ótken brıfıngide osyndaı málimet aıtty, dep habarlaıdy QazAqparat tilshisi.

«Memlekettik bazalarmen ıntegratsııa jasaý arqyly Áskerı bılet rásimdeý protsesiniń kólemi 2-3 ese azaıady. Odan bólek Áskerı bıletke deıin Áskerge tirkeý bıleti degen bar. Kelesi jyly sol tirkeý bıletin múldem alyp tastaǵymyz kelip otyr. Mysaly, qazir 17 jastaǵy ásker qataryna shaqyrylmaǵan azamattar medıtsınalyq tekserýden ótedi. Sodan keıin densaýlyǵyna qaraı qaı áskerı komıssarıatqa tirkelgeni aıtylyp, Tirkeý bıleti beriledi. Biraq kelesi jyldan bastap osy protsesti basqasha jasamaqshymyz. Ondaı uǵymnyń ózin alyp tastaımyz. Áskerge tirkeý bıleti degen bolmaıdy», - dedi mınıstrdiń orynbasary.

Onyń aıtýynsha Áskerge tirkeý bıletine jazylǵyp kelgen málimetterdi endi ár bolashaq sarbaz óziniń «jeke kabınetinen» kóre alady.

«Áskerge shaqyrylýshynyń jeke kabınetine qandaı komıssarıatqa tirkelgeni týraly qysqasha SMS keledi. 18-ge tolǵannan keıin ýnıversıtetke barsańyz, «Siz joǵary bilim alyp jatqan merzimde áskerı mindetten bosatyldyńyz»degen qysqasha habarlama keledi. Al eger ýnıversıtetke barmasańyz, qaı komıssarıatqa tirkelgenińizdi jeke kabınetten kóre alasyz. Kelesi jyldan bastap osy ózgeristerdi engizemiz degen úmit bar», - dedi Darhan Ahmedıev.

Mınıstrliktiń deregi boıynsha, bıyl Qarýly kúshterde 7 sýıtsıd áreketi tirkelip, tórteýi qaıǵyly aıaqtalǵan.