Kelesi aıdan bastap attestatsııadan ótken muǵalimder ústemaqy alady - Erlan Saǵadıev
«Bıyl pedagogtardy attestatsııadan ótkizýdiń jańa júıesi engizildi. Attestatsııalaýǵa 60 myńǵa jýyq muǵalim qatysty. Olardyń ishinde 36 myńnan astamy attestatsııadan ótti. Ol 63 protsentti quraıdy. Osy jyldyń qyrkúıek aıynan bastap attestatsııadan ótken muǵalimderge alǵan kategorııalaryna qaraı ústemaqy tólenedi», - dedi E.Saǵadıev Úkimettiń búgingi otyrysynda.
Aıta keteıik, attestatsııanyń nátıjesi boıynsha 50 protsentke deıingi ústeme aqy qarastyrylǵan. Budan bólek, búginde jańartylǵan bilim mazmuny boıynsha sabaq beretin muǵalimderge 30 protsenttik aqy tólenip jatyr. Ótken jyly 1, 2, 5 jáne 7-synyptar jańa oqý baǵdarlamasyna kóshse, bıyldan bastap 3, 6 jáne 8-synyptar jańartylǵan mazmun boıynsha bilim ala bastaıdy. Demek, osy synyptardyń muǵalimderi de 30 protsenttik qosymsha aqy alatyn bolady.
Mınıstrdiń sózine qaraǵanda, osy jyldyń aıaǵyna deıin mektep oqýshylarynyń 75 protsenti jańartylǵan mazmun boıynsha oqıdy.
«Eki jylda shamamen 150 myń muǵalim arnaıy kýrstan ótti. Qazirgi ýaqytta 73 myń pedagog oqyp jatyr. Jańartylǵan mazmun boıynsha sabaq beretin muǵalimderdiń jalpy sany - 205 myń adam. Búginde olardyń 67 protsentiniń jalaqy kólemi 30 protsentke kóbeıdi», - dep atap kórsetti E.Saǵadıev.
Aıta keteıik, aldaǵy ýaqytta ulttyq biryńǵaı testileý tártibine birqatar ózgerister engizilýi múmkin. Atalǵan ózgerister iske assa, muǵalimderdiń bos ýaqyty kóbeıedi.