Kelesi aıdaǵy egis jumystaryna fermerler daıyn emes – depýtat bıdaı máselesi týraly
«Qazir maǵan Aqtóbeden bastap, Pavlodar, Qostanaı, Petropavl, Aqmola oblystaryna deıin barlyq óńirlerdiń sharýalary, bıdaı óndirýshileri habarlasýda: «Bir shara jasańyzdar, bizdi óltirip jatyrsyzdar», dep jazady. Munyń sebebi mynada: bizde jazǵy ýaqytta eksportqa tyıym salynǵandyqtan, ótken jylǵy bıdaı qaldyqtary satylmaı qaldy. Memlekettik organdar eksportqa ruqsat berem degenshe, reseılik astyq pisip-jetildi. Olar bizdiń dástúrli naryqtarymyzǵa túsip, bizdi Ózbekstan, Qyrǵyzstan, Tájikstan, Túrikmenstan naryǵynan ysyryp shyǵardy», - dedi Aıdarbek Qojanazarov.
Depýtattyń aıtýynsha, reseılik bıdaıdyń sapasy tómen, tıisinshe baǵasy da arzan.
«Bizdiń astyq árqashan joǵary sapaly bolyp sanalyp keldi, al Orta Azııa naryǵy úshin bizdikindeı joǵary sapaly astyq kóp mólsherde qajet emes. Osy aptada Reseı astyǵyn shekaradan kólikpen ákelýdi shekteý týraly sheshim qabyldandy. Óıtkeni shetelden jalǵan qujattar boıynsha astyq ákelingen, QQS, tarıfter tólenbegen. Oǵan qosa, bul astyq qazaqstandyq astyq retinde satyldy, munyń bári baǵaǵa áser etti. Biz saýdany qazan-qarasha aılarynda tonnasyna 125 myń teńgeden bastadyq, bul bizdiń fermerlerge 15-20% marja berdi. Al qazir baǵa 85 myń teńgege deıin túsip ketti, ózindik qunynan da tómen satylýda. Árıne, buǵan deıin de bıdaıdy ózindik qunnan tómen satqan kezder boldy. Biraq kelesi aıda egis jumystaryn bastaımyz jáne oǵan esh daıyn emespiz. Fermerlerdiń egin egýge jáne jınaýǵa qarajaty jetpeıdi», - dep túsindirdi depýtat.
Sonymen birge, depýtat memlekettik qorǵa astyqty tómen baǵamen satyp alýdy usynady, bul baǵany tonnasyna keminde 100 myń teńgege deıin teńestirýge múmkindik beredi.
«Bul bizdiń fermerlerge aqsha tabýǵa, eń bolmaǵanda óz qarajatyn qaıtaryp alýǵa jáne sol jerge qaıta ınvestıtsııalaýǵa múmkindik beredi. Biz fermerlerdiń shalqyp júrgisi keletinin aıtyp otyrǵan joqpyz, kem degende jyl saıynǵy óz qyzmetin jalǵastyrýy kerek», - dedi A. Qojanazarov.