Keleshekte IT áıelderdiń úırenshikti mamandyǵyna aınalady — Aıda Balaeva
Quttyqtaý hatty «TechnoWomen» KEU basqarma tóraǵasy Ázıza Shójeeva oqyp berdi.
«Búginde IT álemindegi áıel eshkimdi tań qaldyrmaıdy. Óz ómirin joǵary tehnologııamen baılanystyratyn áıelder sany jyldan-jylǵa artyp keledi. Áıelder isteri jáne otbasylyq-demografııalyq saıasat jónindegi ulttyq komıssııa Ortalyq Azııanyń iri halyqaralyq IT startaptar tehnoparki „Astana Habqa“ járdemdesip, IT salasyndaǵy birqatar jobalardyń bastamashysy boldy. Óńirlerde áıelder men qyzdardyń tsıfrlyq daǵdylary men quzyrettiligin iske asyrý úshin joǵary oqý oryndary men kolledjder bazasynda „Technogirls“ klýbtaryn qurý bastamasy kóterildi», - dep jazylǵan A. Balaeva quttyqtaýynda.
Bedeldi álemdik sarapshylardyń boljamyna sáıkes, 2030 jylǵa qaraı IT áıelderdiń úırenshikti mamandyǵyna aınalady.
«Bizdiń mindetimiz — áıelderge arnalǵan tsıfrlyq daǵdylardy ilgeriletý, tsıfrlyq bızneste áıelder kásipkerligin qoldaý, áıelderge tsıfrlyq ekonomıkada óz qabiletterine degen senimdilikti arttyryp, bıznesti basqarý boıynsha oqytýdy yntalandyrý. Osy bastamalardyń bárin júzege asyrý úshin Qazaqstanda TechnoWomen kommertsııalyq emes uıymy quryldy. Búgin sizderdiń nazarlaryńyzǵa mańyzdy áleýmettik máselelerdi sheshýge baǵyttalǵan qazaqstandyq áıelderdiń jobalary usynylady. Sondaı-aq búgin jasandy ıntellekt boıynsha jańa progressıvti kóshbasshylardy, memlekettik jáne jergilikti atqarýshy organdar qazaqstandyq IT kásipkerlermen birlesip mańyzdy mindetterdi sheshe alatyn jańa jobalardy kóremiz. Sizderdiń árqaısylaryńyzda jasandy ıntellekt tehnologııalary arqyly álemdi jaqsartý úshin jańa ınvestıtsııalyq kókjıekter ashatyn ıdeıalaryńyz, bastamalaryńyz, jobalaryńyz bar ekenine senimdimin», - deıdi ulttyq komıssııa tóraǵasy.
Aıta keteıik, Astanada jasandy ıntellekt taqyrybyna arnalǵan «Technowomen Central Asia» halyqaralyq forýmy ótýde. Buǵan deıin jasandy ıntellekt mamandyqtardy qalaı ózgertetini týraly sarapshy pikiri aıtylǵan edi.