Keleshek damý úderisinde kadrlarǵa degen talap ta jańa sapada qoıylady - E. Isaqulov

ASTANA. 14 maýsym. QazAqparat /Qanat Mámetqazyuly/ - Keleshek damý úderisinde kadrlarǵa degen talap ta jańa sapada qoıylady. Búgin QR Prezıdenti janyndaǵy Memlekettik basqarý akademııasynda ótip jatqan «Memlekettik qyzmettiń qazaqstandyq úlgisi: mindetteri men damý keleshegi» atty ǵylymı-praktıkalyq konferentsııa barysynda Májilis depýtaty Erjan Isaqulov osylaı málim etti.

«Jańa tarıhı mańyzdy onjyldyqqa qadam basa otyryp, biz qýatty, gúldengen, básekege qabiletti memleket qurý mindetin alyp otyrmyz. Osy rette kadrlyq qamtamasyz etý jáne kadrlyq saıasat jańa mánge ıe bolyp otyr. Birinshiden - ekonomıka ósiminiń artýyna, óndiristerdi jańǵyrtýǵa jáne ınnovatsııalyq tehnologııalarǵa baǵyttalýǵa, sondaı-aq jobalardy júzege asyrýǵa baılanysty bizdiń elimizge jaqyn jyldary qosymsha bilikti mamandar qajet etiledi», - dedi E. Isaqulov. Máselen, depýtattyń aıtýynsha, 2010 jyldyń ózinde 152 kásiporyn qoldanysqa enip, onda turaqty negizde 20 myńǵa tarta adam jumysqa alynǵan. Sondaı-aq, jalpy elimiz boıynsha 80 túrli óndiris quryldy. Al 2015 jylǵa deıin 8 trln. teńge somasyna taǵy 294 ınvestıtsııalyq jobalardy júzege asyrý kózdeledi. Buǵan 161 myń turaqty jumys oryndary qurylady.

«Sonymen qatar, atalǵan jobalardyń bári ınnovatsııaǵa negizdelmekshi. Endeshe, kadrlarǵa degen talap ta jańa sapada bolmaq. Biz buǵan ázirmiz be? Bizdiń daıarlaý jáne qaıta daıarlaý júıemizdiń talapty qanaǵattandyrmaıtynyn eskersek, onda máseleniń aıtarlyqtaı kúrdeli ekendigin sezemiz», - dedi E. Isaqulov.