«Keleshek» baǵdarlamasy: Keler jyly esep-shottar ashý bastalady

<p>Ǵylym jáne joǵary bilim mınıstri Saıasat Nurbek &laquo;Keleshek&raquo; baǵdarlamasyn júzege asyrýǵa qatysty túsinik berdi, dep habarlaıdy QazAqparat tilshisi.</p>

«Memleket basshysynyń Joldaýyn oryndaý aıasynda azamattarǵa joǵary bilim alýǵa jaǵdaı jasaýdyń qosymsha tetigi retinde «Keleshek» biryńǵaı erikti jınaqtaý júıesin engizý pysyqtalyp jatyr. Qazir Qazaqstanda demografııalyq ósim baıqalyp otyr. Keıingi úsh jylda 1 mln-ǵa jýyq bala dúnıege keldi. Ortasha eseppen alǵanda, jyl saıyn elimizde 400 myńǵa tarta bala dúnıege keledi. Qazir sol balalardyń ortasha eseppen 40 paıyzy memlekettik grantpen qamtamasyz etilgen», - dedi S. Nurbek Qazaqstannyń ornyqty damý salasyndaǵy ulttyq maqsattar men mindetterdi iske asyrý monıtorıngi jónindegi Parlamenttik komıssııa otyrysynda.

Onyń aıtýynsha, demografııalyq ósimdi eskere otyryp, keler 10-15 jylda jastardyń kóbin grantpen qamtý múmkin bolmaıdy.

«2020 jyldan beri jyl saıyn grant sany kóbeıip keledi. Biraq munyń ózi jetkiliksiz bolady. Sondyqtan biryńǵaı erikti jınaqtaý júıesine kóship jatyrmyz. Onyń ústine jeńildetilgen nesıe jáne saralanǵan granttar júıesi eskerilgen. Kelesi jyldan «Keleshek» baǵdarlamasy aıasynda esep-shottar ashý qarastyrylyp otyr», - dedi mınıstr.

Budan buryn habarlanǵandaı, bir jylda elimizde 403,5 myń náreste dúnıege kelgenin jazǵan edik.

Aıta keteıik, bıylǵy Joldaýynda Memleket basshysy Qasym-Jomart Toqaev bes jastan asqan balalarǵa arnalǵan «Keleshek» atty biryńǵaı erikti jınaqtaý júıesin engizýdi tapsyrdy.

«Bul baǵdarlamada memleket tarapynan usynylatyn bastapqy bilim berý kapıtaly, jyl saıynǵy memlekettik syıaqy jáne ınvestıtsııalyq tabys qarastyrylýǵa tıis. Osy jınaq pen «Ulttyq qor – balalarǵa» jobasynyń qarajaty qosylǵanda jas urpaqtyń sapaly bilim alýyna múmkindik týady», - dedi Prezıdent.