Kelesi jyly ulttyń qaıta órleýiniń kýási bolamyz - Qasym-Jomart Toqaev

<p>Memleket basshysy Qasym-Jomart Toqaev jańajyldyq beınequttyqtaýynda keler jyly qandaı iri sharalar ótetinin aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Jańa jyl – árdaıym jańa mindetter júkteletin, jańa syn-qaterlerdi eńseretin kezeń. Biz kelesi jyly ulttyń qaıta órleýiniń kýási bolamyz. Men buǵan kámil senemin. Alaıda básekege qabiletti ári damyǵan el bolý úshin áli de kóp ter tógýimiz qajet», - dedi Qasym-Jomart Toqaev.

Prezıdent jańa jylda memlekettigimizdi nyǵaıtý jáne halyqtyń ál-aýqatyn arttyrý jolyndaǵy júıeli reformalar jalǵasatynyn jetkizdi.

«Biz zań men tártiptiń ústemdigin ornyqtyrý úshin keshendi sharalar qabyldaımyz. Memleket tarapynan ónerkásipti, aýyl sharýashylyǵyn, energetıka jáne ekonomıkanyń basqa da salalaryn órkendetýdi kózdeıtin tyń bastamalar qolǵa alynady. Biz áleýmettik jaǵdaıy tómen, kómekke muqtaj jandarǵa árdaıym qamqor bolamyz. Muǵalim, dáriger, qutqarýshy, áskerı qyzmetshi, tártip saqshysy jáne basqa da kásip ıelerine qoldaý kórsetemiz», - dedi ol.

Sonymen birge, jas urpaqtyń jarqyn bolashaǵyna jol ashatyn mańyzdy sheshimder qabyldanýda. Jaqynda Ulttyq qordaǵy qarjynyń bir bóligi balalardyń esepshotyna túse bastaıdy.

«Elimizdiń jastary bolashaqqa nyq senimmen qaraýy kerek. Kelesi jyly ultymyzdyń tarıhyna baılanysty birqatar is-shara ótedi. Halqymyzdyń tulǵalaryn este saqtap, olardyń eńbegin dáripteý – urpaq paryzy. Sondaı-aq aldaǵy jyly elimizde Dúnıejúzilik kóshpendiler oıyny ótedi. Sportshylarymyz Jazǵy olımpıadaǵa qatysady. Túptep kelgende, ár azamat óz salasynyń naǵyz mamany bolýy kerek. Sonda ǵana Otanymyz ósip-órkendeıdi», - dedi Memleket basshysy.