Kelesi jyly Qazaqstan Halyqaralyq Araldy qutqarý qoryna tóraǵalyq etedi

<p>Sý resýrstary jáne ırrıgatsııa mınıstri Nurjan Nurjigitov Shveıtsarııanyń Qazaqstandaǵy Tótenshe jáne Ókiletti Elshisi Salman Bal myrzamen jáne sý yntymaqtastyǵy máselelerimen aınalysatyn Shveıtsarııa damý jáne yntymaqtastyq agenttiginiń Blue Peace Central Asia (BPCA) baǵdarlamasynyń ókilderimen kezdesti, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Nurjan Nurjigitov 2024 jyldyń 1 qańtarynan bastap Qazaqstan Halyqaralyq Araldy qutqarý qoryna tóraǵalyq etetinin, sondyqtan elimiz Ortalyq Azııa memleketterimen, sondaı-aq basqa da halyqaralyq uıymdar men qarjy ınstıtýttarymen yntymaqtastyqty arttyrýǵa daıyn ekenin málimdedi.

Mınıstr Qazaqstan Memleket basshysynyń óńirde Ortalyq Azııanyń barlyq elderiniń múddelerin eskeretin Halyqaralyq sý-energetıkalyq konsortsıým qurý jónindegi bastamalaryn iske asyrýǵa nıetti ekenin atap ótti.

Elshi BPCA-nyń birinshi kezeńi aıaqtalýǵa jaqyn ekenin aıtty, sondyqtan qazirgi ýaqytta baǵdarlama ókilderi ekinshi kezeńde qandaı baǵyttardy qamtý kerektigin anyqtaý úshin Ortalyq Azııa elderine barady.

Sonymen qatar, Ózbekstanda Qazaqstan, Qyrǵyzstan, Tájikstan, Túrikmenstan jáne Ózbekstan qatysatyn gıdrogeologııalyq boljaý baǵdarlamasy iske qosylyp jatyr. 

Baǵdarlama Ortalyq Azııa elderi arasyndaǵy sý aǵyny men sý shyǵynyn baqylaýǵa múmkindik beredi.

Blue Peace Central Asia ókilderi olardyń jobasy birneshe baǵytty qamtıtynyn atap ótti.

Foto: Sý resýrstary jáne ırrıgatsııa mınıstrligi

Mysaly Halyqaralyq Araldy qutqarý qory jáne Dúnıejúzilik bank iske asyryp jatqan Ortalyq Azııa úshin sý-energetıkalyq baǵdarlamasy (Cawep) sheńberinde sý resýrstaryn basqarýdyń óńirlik ınstıtýttaryn nyǵaıtý, sarapshylardy tartý jáne tájirıbe almasý, transshekaralyq gıdrotehnıkalyq qurylystardy jańǵyrtý jáne rekonstrýktsııalaý, sondaı-aq ártúrli kýrstar men trenıngter arqyly kadrlar daıarlaý jáne olardyń biliktiligin arttyrý.

«Kelesi jyly Dúnıejúzilik bankpen birge júzege asyryp jatqan Kishi Araldy saqtaý jobasynyń ekinshi kezeńin bastaýdy josparlap otyrmyz. Sondyqtan biz Blue Peace-pen birlesip Ortalyq Azııa elderiniń sý-energetıka salasyndaǵy ózara is-qımyly máselesimen jumys istegimiz keledi. Sondaı-aq, jańa kadrlar daıarlaýǵa jáne sý salasynda jumys istep júrgen mamandardyń biliktiligin arttyrýǵa múddelimiz. Bizdiń yntymaqtastyǵymyz tyǵyz ári jemisti bolady dep senemin», - dedi QR Sý resýrstary jáne ırrıgatsııa mınıstri Nurjan Nurjigitov.