Kelesi Olımpıadaǵa deıin kútetin azamatqa ǵana turmysqa shyǵamyn – Ábıba Ábýjaqynova

<p>PARIJ. KAZINFORM &ndash; Frantsııa astanasy Parıj qalasynda ótip jatqan Olımpıada oıyndarynda dzıýdodan áıelder arasynda 48 keli salmaqta el namysyn Ábıba Ábýjaqynova qorǵaǵan bolatyn.</p>

Ókinishke qaraı óz salmaǵynda álemdik reıtıngte 3-shi orynda turǵan otandasymyz Olımpıada oıyndaryn 5-shi orynmen aıaqtaǵan bolatyn. Búgin sportshy qyzymyzben Parıj tórinde suhbattasýdyń sáti tústi.

— Ábıba, Olımpıadan keıin júldege qolyńyz jetpeı qalǵany úshin qatty jylap, ókingenińizdi jaqsy bilemiz. Onyń bári de ótti de, ketti. Qazir qandaı kóńil kúıdesiz?

— «Ýaqyttyń jazbaıtyn jarasy joq» dep jatýshy edi ǵoı. Áreń degende óz-ózime kelip qaldym. Dese de ishimdi áli de ókinish oty jandyryp, kúıdirip tur. Biraq, qaıdan, qalaı jyǵyldym, sol jerden qaıta solaı turýǵa sert ettim ózime. 

— Keshe, jeke bapkerińiz, «eger Ábıba Parıjde júldeger atansa, sporttan qol úzbek bolǵan» dedi. Bul qanshalyqty ras?

— Negizi, ondaı oı bolǵany ras. Dzıýdodan qazaq qyzdary arasynda men tuńǵysh ret álem chempıonatynyń júldegeri atandym. Olımpıada oıyndarynda da týra solaı alǵashqy qazaq qyzy bolǵym kelgen. Ókinishke qaraı Parıjde ol múmkindik ustatpaı ketti. Biraq, bári bir sol armanǵa, sol maqsatqa qol jetkizbeı toqtamaımyn bel býyp otyrmyn. Los-Andjelestiń aýyly da alys emes. Áne-mine degenshe olda kelip qalady.

— Qazir búkil jurttyń nazary olımpıadashylarymyz da ekeni aıtpasaq ta túsinikti. Áleýmettik jelilerdi qanshalyq qaraısyz? Ózińiz týraly qandaı pikirler aıtylyp jatyr?

— Áleýmettik jelige kóp qaraı bermeımin. Otyratyn ýaqyt ta bola bermeıdi. Biraq, arasynda ınstagram jelisine qosylamyn. Ózim jaıynda aıtylǵan, jazylǵan pikirlerge de kóz qyrymdy salamyn. Osy joly bir baıqaǵanym ózim týraly jaman pikirler, kózqarastar kezdestirgen joqpyn. Men kórgen pikirlerde «Ábıba jasyma, jylama, áli ómiriń alda, kelesi Olımpıadada alasyń, biz saǵan senemiz, qaıta tatamıǵa oral» degen sııaqty pikirlerdi kórip jatyrmyn. Onyń ózi maǵan úlken medeý boldy. Jaqsy sóz jarym yrys degen ǵoı, men osydan keıin de óz-ózimdi qaıta qolǵa ala bastadym. Armanym Olımpıadanyń medalin alyp, qazaq sportynyń tarıhyn jańartý.

— Qazirgi armanyńyz tek Olımpıada medali ma? Basyńyzǵa aq oramal taǵyp, aq kóılek kıip, «appaq» kelin ataný oıyńyzda joq pa?

— Negizi, osy Olımpıadada sol armanym oryndalǵanda mindetti túrde bolashaq jarymdy taýyp, turmysqa shyǵyp, besigimdi terbetip úıde otyrǵym kelgen. Osy joly jeńilip qalǵannan keıin ol oıymnan aınyp qaldym. Qazir jigitim de joq. Eger meni túsinip, 2028 jylǵy Olımpıadaǵa deıin kútemin degen azamat bolsa, turmysqa shyǵýǵa daıynmyn.

— Áńgimeńizge rahmet!