Keles aýdanynda qoǵamdyq qabyldaýlar ótti

KELES. QazAqparat – Túrkistan oblysy Keles aýdany ákiminiń apparaty jáne 12 aýyldyq okrýginde ashyq esik kúnderi ótkizildi. Aýdan ákimi Aqmentaı Esbaev tańnan bastap turǵyndardy qabyldap, olardyń máselelerimen tanysty, dep habarlaıdy QazAqparat tilshisi.

Ashyq esik kúnderi Memleket basshysy Qasym-Jomart Toqaevtyń Joldaýynda aıtylǵan «Halyq únine qulaq asatyn memleket» tujyrymdamasy negizinde uıymdastyryldy. Halyqpen tikeleı qatynas ornatý maqsatynda ótken sharaǵa sáıkes jergilikti halyq memlekettik organdarda kókeılerinde júrgen máselelerin jetkizdi. Bul kúni aýyldyq okrýgterdegi ákimder jeke qabyldaýlaryn tańǵy 09:00-de bastap, túski 13:00-ge deıingi aralyqta ótkizdi. Jalpy aýdan kóleminde 32 turǵyn qabyldaýǵa kelip, ózderiniń máselelerin aıta aldy. Túski úzilesten soń, ákimder jeke qabyldaýlar ótkizdi. Onda aýdan halqy aýyz sý men jol, áleýmettik máseleler sııaqty birqatar problemalaryn ashyp aıtty. Óz saýaldaryna tushymdy jaýaptar aldy.