Keler jyly elektr energetıkasyn damytý tujyrymdamasy qabyldanady
«Qazir ázirlenip jatqan «Investıtsııanyń ornyna tarıf» baǵdarlamasy energııa óndirýshi uıymdardyń qoldanystaǵy aktıvterin qaıta jańǵyrtýǵa jáne keńeıtýge múmkindik beredi. Jyl saıynǵy salaǵa quıylatyn ınvestıtsııa kólemi 400 mlrd teńgeni quraıdy. 2023 jyldyń 1 toqsanynda eldiń barlyq jylý elektr ortalyqtary men elektr jelilerine aýdıt aıaqtalady. Aýdıt júrgizý arqyly salaǵa qatysty problemalar men mekemelerdiń tehnıkalyq jaı-kúıi anyqtalady», - dedi Bolat Aqsholaqov OKQ-de ótken brıfıngide.
Mınıstrdiń aıtýynsha, energetıkanyń tsıfrlyq platformasyn paıdalanýǵa berý josparlanýda.
«Kelesi jyly elektr energetıkasy salasyn damytýdyń 2032 jylǵa deıingi tujyrymdamasy qabyldanady. Sondaı-aq táýekelderdi basqarýǵa jáne stantsııalardyń tehnıkalyq jaı-kúıin baqylaýǵa múmkindik beretin energetıkanyń tsıfrlyq platformasy paıdalanýǵa berilmek», - deıdi ol.
Buǵan deıin Bolat Aqsholaqov qazaqstandyqtardy jaryqty únemdi paıdalanýǵa shaqyrǵan edi.