Keler jyly eki JOO-da Tsıfrlyq ýnıversıtet jobasy engiziledi

ASTANA. QazAqparat – «Tsıfrlyq ýnıversıtet» pılottyq jobasy Q. Sátbaev atyndaǵy Ulttyq ǵylymı-zertteý ýnıversıteti men D. Serikbaev atyndaǵy Shyǵys Qazaqstan tehnıkalyq ýnıversıtetinde engiziledi. Bul týraly QazAqparat tilshisiniń saýalyna jaýap bergen Ǵylym jáne joǵary bilim mınıstri Saıasat Nurbek málim etti, dep habarlaıdy QazAqparat tilshisi.

«Tsıfrlyq ýnıversıtet» atty úlken pılottyq jobany iske qosyp jatyrmyz. Ol úshin eki ýnıversıtetti tańdadyq. Onyń bireýi – ulttyq, ekinshisi – aımaqtyq deńgeıde. Ulttyq joǵary oqý oryndarynan Q. Sátbaev atyndaǵy Ulttyq ǵylymı-zertteý ýnıversıteti, aımaqtyq joǵary oqý oryndarynan D. Serikbaev atyndaǵy Shyǵys Qazaqstan tehnıkalyq ýnıversıteti tańdaldy. Tsıfrlyq damý mınıstrliginiń kómegi arqyly biz álemdik tájirıbede bar jańalyqtardy synap kórgimiz keledi. Jaqyn arada onyń jobasyn usynamyz. Bastamany alǵashqy kezeńde pılottyq rejımde iske qosýdy uıǵardyq», - dedi mınıstr tilshi saýalyna oraı.

Іlki joba 2023 jyly bastalyp, bir jyl boıy júrgiziledi. Tıisinshe, keler jyldyń qańtarynda ony iske asyrý boıynsha Tsıfrlyq damý, ınnovatsııalar jáne aeroǵarysh ónerkásibi mınıstrligimen jeke kelisimge qol qoıý josparlanyp otyr.

«Tsıfrlyq ýnıversıtet» jobasy bilim berý protsesine eń zamanaýı tehnologııalardy engizýdi, onlaın-platformalardy keńinen paıdalanýdy, jekelegen bilim berý salalary boıynsha kýrstar men jańa formattardy engizýdi kózdeıdi.