Keler jylǵy Túrki áleminiń mádenı astanasy belgili boldy

ASTANA. QazAqparat - Túrkııanyń Kastamoný qalasynda Túrki áleminiń mádenı astanasynyń jabylý saltanaty ótip, kelesi jylǵy mádenı astana anyqtaldy, dep habarlaıdy QazAqparat tilshisi.

Kastamoný qalasyndaǵy «Atatúrik» sport kesheninde ótken mádenı sharaǵa bizdiń elimizden bólek, Ázerbaıjan, Túrkııa, Ózbekstan, Qyrǵyzstan; Reseı federatsııasynan: Bashqurtstan, Qabardın-Balqar, Tatarstan, Týva; sondaı-aq Gagaýzııa (Moldova), Serbııa jáne Bolgarııa elderiniń shyǵarmashylyq ujymdary qatysty.

Aıtýly sharaǵa barlyǵy 250-ge jýyq ónerpaz qatysyp, Qazaqstandy Uly Abaıdyń «Jelsiz túnde jaryq-aı» atty shyǵarmasymen elimizge tanymal jas oryndaýshy Ayree tanystyrdy.

Odan bólek, memlekettik «Saltanat» bı ansambli óz ónerlerin ortaǵa saldy. Shyǵarmashylyq ujymnyń horeografııalyq ónerinde qazaq halqynyń salt-dástúrleri men zamanaýılyǵy úılesim taýyp, kórsetilgen ónerdiń erekshe beıneli bolýyna áserin tıgizdi.

Jabylý rásimi barysynda turaqty keńestiń sheshimine sáıkes Túrki áleminiń 2019 jylǵy mádenı astanasy Qyrǵyzstannyń Osh qalasy bolyp belgilendi. Sondaı-aq, atalǵan eldiń ókilderine mádenı astananyń týy men nyshany tabys etildi.

Sonymen qatar, Kastamoný qalasynda TÚRKSOI elderi Mádenıet mınıstrleriniń 36-shy otyrysy ótip, onyń sheńberinde ústimizdegi jyly jasalǵan jumystardyń qorytyndysy shyǵaryldy.

Aıta ketsek, Túrki áleminiń mádenı astanasyn tańdaý - TÚRІKSOI halyqaralyq uıymynyń 2010 jyly usynǵan bastamasyna sáıkes júrgiziledi. Qalany túrki halyqtarynyń mádenı ortalyǵy etip saılaý sol óńirdiń damýyna nazar aýdarýǵa múmkindik beredi. 2012 jyly Astana qalasy - eń alǵashqy mádenı astana bolǵan edi. Bul ataq túrli kezeńderde Eskıshehır, Qazan, Mary, Shekı qalalaryna berildi.

Eske salsaq, ótken jyly Túrki áleminiń mádenı astanasy kıeli Túrkistan qalasy bolyp, onyń aıasynda 40-qa jýyq túrli sharalar uıymdastyryldy.

Qazaqstandyq delegatsııanyń Túrkııaǵa saparyn QR Mádenıet jáne sport mınıstrligi uıymdastyrdy.