Keler jyldary ekonomıka ósimi jedeldeıdi - Ǵalymjan Pirmatov

NUR-SULTAN. QazAqparat – 2022 jyldyń qorytyndysy boıynsha jalpy ishki ónimniń ósimi 2,5-3,5 paıyz bolady. Bul týraly QR Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Bıylǵy jylǵy 7 aıda jalpy ishki ónimniń ósýi 3,3%-dy qurady. Qashaǵandaǵy jóndeý jumystarynyń jáne Kaspıı qubyr konsortsıýmyndaǵy óndiristik protsesterde saqtalyp otyrǵan irkilisterdiń saldarynan eldegi munaı óndirisiniń qysqarýy nátıjesinde ekonomıka ósiminiń baıaýlaýy baıqalyp otyr. Ekonomıkanyń ósýine óńdeý ónerkásibi, saýda, qurylys jáne kólik salalary oń úles qosty», - dedi Ǵ. Pirmatov elordada ótken baspasóz máslıhatynda.

Onyń aıtýynsha, jalpy ishki ónimniń ósýine negizgi qozǵaýshy kúsh retinde qurylys salasy serpin berip otyr.

«Ekonomıkalyq belsendiliktiń baıaýlaýy, Kaspıı qubyr konsortsıýmyndaǵy jumys boıynsha jaǵdaıdyń belgisizdigi, sondaı-aq qalǵan eki iri ken oryndarynda josparlanǵan jóndeý jumystary jaǵdaıynda 2022 jyly ekonomıkanyń ósýi shamaly tómendeý jaǵyna qaraı qaıta qaraldy. 2022 jyldyń qorytyndysy boıynsha jalpy ishki ónimniń ósýi 2,5-3,5 paıyz bolady. Qalyptasqan joǵary baǵa konıýnktýrasy men jyl sońyna taman munaı óndirisiniń ósý qarqynyn qalpyna keltirý aıasynda ishki suranystyń barlyq komponenti men naqty eksport oń úles qosýdy jalǵastyrady», - dedi UB basshysy.

Onyń sózine qaraǵanda, 2023-2024 jyldary munaı óndirýdiń ulǵaıýy nátıjesinde eksport kólemi artyp, ekonomıka ósimi jedeldeıdi. 2023 jyly jalpy ishki ónimniń ósýi 4-5% deńgeıinde baǵalanyp otyr. Al 2024 jyly JІÓ ósimi osyndaı deńgeıde saqtalýy múmkin.