Keler jyldan bastap temeki baǵasy qymbattaýy múmkin
16:11, 14 Jeltoqsan 2022
ASTANA. QazAqparat – Keler jyldyń qańtarynan bastap temeki ónimderiniń baǵasy qymbattaýy múmkin. Bul týraly Qarjy mınıstrligine qarasty Memlekettik kirister komıtetiniń ashyq talqyǵa shyǵarǵan buıyryǵynda jazylǵan, dep habarlaıdy QazAqparat tilshisi.
«Fıltrli, fıltrsiz 20 sıgaretke, papırostarǵa, sıgarıllalarǵa jáne qyzdyrylatyn temekisi bar buıymdarǵa 2023 jylǵy 1 qańtardan bastap 650 teńge mólsherinde eń tómengi bólshek saýda baǵacy belgilensin.
Eń tómengi bólshek saýda baǵalaryn ulǵaıtý «Atameken» ulttyq kásipkerler palatasynyń bastamasyna sáıkes, logıstıkalyq irkilisterdiń táýekelderin azaıtý maqsatynda usynylady», - delingen qujatta.
Aıta keteıik, buǵan deıingi tıisti buıryqta keler jyldyń basynan temeki buıymdarynyń eń tómengi baǵasy 630 teńge bolatyny kórsetilgen. Endi usynylyp otyrǵan ózgeriske saı, shekti qun 20 teńgege qymbattamaq.