Keler jyly UBT-nyń jańa formaty iske qosylady

<p>ASTANA. KAZINFORM &ndash; 2025 jyly Ulttyq biryńǵaı test tapsyrýdyń jańa formaty pılottyq joba retinde iske qosylady. Bul týraly Ǵylym jáne joǵary bilim mınıstri Saıasat Nurbek Úkimettegi brıfıngte málim etti.</p>

Mınıstr búginde kóptegen elderde testileýdi alyp tastaý týraly qyzý pikirtalas júrgizilip jatqanyn atap ótti.

«Naqty mysal – AQSh, onda pandemııa kezinde standartty testter alynyp tastaldy jáne ýnıversıtetter óte kúrdeli máselege tap boldy. Ortalyqtandyrylmaǵan oqýǵa túsý júıesine qaramastan, kem degende stýdentterdi baǵalaý, salystyrý jáne irikteý úshin qandaı da bir standart qajet», - deıdi Saıasat Nurbek.

Onyń aıtýynsha, mınıstrlik 2021 jyldan bastap Dúnıejúzilik banktiń qoldaýymen UBT formatyn qaıta qurý jáne eń bastysy – test suraqtarynyń mazmunyn túbegeıli qaıta óńdeý boıynsha úlken jobany iske qosqan.

«Aldyńǵy jyly biz eki baǵyt boıynsha jumys istedik. Birinshisi – SIT sııaqty túbegeıli jańa format boıynsha testterdi daıyndaý, barlyq suraqtardy mazmundy túrde qaıta qaraý kerek boldy. Ótken aptada bul komponent aıaqtaldy. Test daıyndaýdy álemge áıgili frantsýz kompanııasy júrgizdi. Jańa model boıynsha 350 testolog daıyndaldy» - dedi mınıstr.

Ekinshi baǵyt – fın kompanııalar tobymen mazmundy tásil boıynsha jumys.

«Bul arnaıy oqytylǵan testologtar toby SIT formatyna uqsas jańa ádisteme boıynsha suraqtar daıyndaı bastaıdy, bul halyqaralyq deńgeıde tanylǵan test. Oǵan qosa, biz bazany qurǵanda jańa UBT formatyn pılottyq túrde bastaý úshin kem degende 50 myń suraq ázirleýimiz kerek bolady. Munda óte muqııat, uqypty bolýymyz kerek, óıtkeni formattyń kúrt ózgerýi de úlken problemalarǵa alyp keledi, joǵary synyp oqýshylaryn osy formatqa daıyndaý qajet», - dep atap ótti S.Nurbek.

Vedomstvo basshysy osy jyldan bastap mınıstrlik úlken pılottyq jobaǵa daıyndyqty bastaıtynyn aıtty.

«Biz pılottyq jobany kelesi jyly bastaımyz, joba UBT formatyn birden ózgertpeıdi, belgili bir pılottyq rejımde iske qosylady. Birte-birte biz SIT halyqaralyq standartyna kóshemiz, onda árbir talapkerdiń ózi testileý ornyn, ýaqytyn tańdaıdy, daıyndalady, tapsyrady, sertıfıkat alady, sonymen oqýǵa túsedi», - dedi mınıstr.