Keler jyly Almaty ekonomıkasynyń ósýi 6,4% deńgeıinde bolady

<p>ALMATY. KAZINFORM — Almatyda barlyq áleýmettik-ekonomıkalyq kórsetkish boıynsha oń dınamıka qalyptasqan. Bul týraly Ortalyq kommýnıkatsııalar qyzmetinde ótken brıfıng barysynda Almaty ákimi Erbolat Dosaev málimdedi.</p>

Qala basshysynyń sózinshe, Memleket basshysynyń tapsyrmalaryn oryndaý úshin 2022 jyldyń qyrkúıeginde qalany damytýdyń 2030 jylǵa deıingi baǵdarlamasy qabyldandy. Onyń basty maqsaty — Almatyny turǵyndary úshin jaıly ári qaýipsiz qalaǵa aınaldyrý.

— Bıyl Almatyda 2023 jyly rekordtyq ekonomıkalyq ósimdi eskere otyryp, ekonomıkalyq damýdyń joǵary qarqyny 9,7% deńgeıinde saqtalyp otyr. 2024 jyldyń 11 aıynyń qorytyndysy boıynsha Almatynyń qysqa merzimdi ekonomıkalyq ındıkatory 6,6%-ǵa deıin jedeldedi. 2024 jyldyń qorytyndysy boıynsha Almaty ekonomıkasynyń ósýi 5,5% deńgeıinde boljanady, 2025 jyly ósim 6,4%-ǵa deıin artady, — dedi Erbolat Dosaev.

Eske salaıyq, 2023 jyly qala ekonomıkasy 10,1 paıyzǵa ósip, 24,8 trln teńgege jetken edi. Bul keıingi 10 jyldaǵy rekordtyq kórsetkish. 

Erbolat Dosaev Almaty ekonomıkasynyń basty draıveri shaǵyn jáne orta bıznes ekenin tilge tıek etti. Qazir bul salada jumyspen qamtylǵandardyń jalpy sanynyń 85 paıyzdan astamy nemese 942 myńǵa jýyq almatylyq jumys isteıdi.

— Shaǵyn jáne orta bıznesti qoldaý jáne damytý maqsatynda 2024 jyly bıýdjetten 1,8 myń jańa jobany qoldaý úshin 53 mlrd teńge bólindi, al 2025 jylǵa 71 mlrd teńge josparlanǵan. Bul shaǵyn jáne orta bıznestiń taǵy 2 myń jańa jobasyn qoldaýǵa múmkindik beredi. Bizdiń maqsatymyz — shaǵyn jáne orta bıznestiń qala ekonomıkasyna qosqan úlesin 2024 jylǵy 60%-ten 2030 jylǵa qaraı 75%-ke deıin arttyrý, — dedi ol.

Osylaısha, Almaty óziniń turaqtylyǵy men joǵary áleýeti bar Ortalyq Azııanyń jetekshi ekonomıkalyq ortalyqtarynyń biri retindegi mártebesin nyǵaıtýdy jalǵastyra bermek.