Keler jyly 24 aýylǵa gaz jetedi — Aqtóbe oblysy

<p>ASTANA. KAZINFORM &mdash; Bıyl Aqtóbe oblysynda turǵyndardy gazben qamtý kórsetkishi 95,7%-ǵa jetti. Bul týraly oblys ákimi Ashat Shaharov Ortalyq kommýnıkatsııalar qyzmetinde ótken baspasóz máslıhatynda málimdedi.</p>

— Bıyl 2 myńnan astam turǵyny bar 7 aýyldy sýmen qamtamasyz ettik. Kelesi jyly 5,5 myńnan astam halqy bar 11 aýylǵa aýyz sý júrgizip, taza aýyz sýmen jabdyqtaý máselesin tolyq sheshemiz. Budan basqa, aýyldardy odan ári gazben qamtamasyz etý mindeti ózekti bolyp qala beredi. Bıyl 2 myńǵa jýyq halqy bar 5 aýyldy gazdandyrýdy aıaqtap, qamtamasyz etý úlesin 95,7%-ǵa deıin jetkizdik, — dedi Ashat Shaharov óńirdiń áleýmettik-ekonomıkalyq damýy týraly esep bere turyp.

Onyń aıtýynsha, keler jyly 9,8 myń halqy bar 24 aýyldy gazdandyrý arqyly gazben qamtý deńgeıin 96,8%-ǵa deıin jetkizý mindeti tur. 

Sonymen qatar, óńirde qoldanystaǵy magıstraldyq gaz qubyrlarynyń júktemesi máselesin sheshý úshin «Buhara-Oral» gaz qubyrynyń úshinshi jelisin salý jobasy júzege asyp jatyr. Bul aldaǵy 50 jylda oblys ortalyǵyndaǵy gaz tapshylyǵyn sheshýge múmkindik beredi.

Odan ári Ashat Shaharov jol jóndeý jáne jańǵyrtý jumysyna toqtaldy. Bıyl bul maqsatqa 64,5 mlrd teńge kózdelgen.

— Aqtóbe qalasynyń 200-den astam kóshesin qalypqa keltirý boıynsha aýqymdy jumys bastaldy. Onyń ishinde turǵyn alaptardaǵy jáne eldi mekenderge kireberis joldar bar. Sol sııaqty 500 shaqyrymnan astam jolǵa asfalt tóseldi. Jyl qorytyndysy boıynsha jergilikti mańyzy bar avtojoldardyń úlesi 75-ten 78%-ǵa deıin jetti, — dedi oblys ákimi.

Búginde respýblıkalyq mańyzy bar «Aqtóbe-Ulǵaısyn» tas jolynyń 2 ýchaskesi boıynsha qujat ázirlenip, qurylys jumystary jáne konkýrstyq rásimder bastaldy. Al qalǵan 5 ýchaske boıynsha jobalaý-smetalyq qujattama ázirlenýde, qurylys jumystary keler jyly bastalady.

— Sondaı-aq, «Qandyaǵash-Embi-Shalqar-Yrǵyz» respýblıkalyq avtojolyna ortasha jóndeý jumystary jalǵasýda. Qazir 25 shaqyrym paıdalanýǵa berilip, Qazavtojolmen birlese jumys júrgizilýde, — dep tolyqtyrdy Aqtóbe oblysynyń ákimi.

Buǵan deıin keler jyly Aqtóbe oblysy 1 trln teńge ınvestıtsııa tartý jospary týraly aıtqan edik.