TAShKENT. KAZINFORM – Ózbekstannyń Mınıstrler kabıneti keler jyldyń 1 qańtarynan bastap úıde ustaýǵa jáne tsırk qoıylymdary úshin paıdalanýǵa tyıym salynatyn jabaıy janýarlardyń tizimin bekitti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Qujatqa saı, tizimge órmekshi, jylan, akýla jáne tasbaqalardyń keıbir túrleri engen. Bul rette jolbarys, arystan, túlki, qasqyr, shımpanzelerdiń barlyq túrin úıde ustaýǵa jáne tsırkte paıdalanýǵa tyıym salynady.
Tizimdegi janýarlardy Ekologııa mınıstrliginiń ruqsaty negizinde haıýanattar baǵynda jáne arnaıy jasaqtalǵan oryndarda (terrarıým, okeanarıým jáne taǵy da basqa) ustaýǵa bolady.
Ózbekstan úkimetiniń qaýlysyna saı, tizimge engen janýarlardy arnaıy oryndarǵa tabystaý, ornalastyrý 2026 jyldyń 1 qańtaryna deıin aıaqtalýy tıis.
Álıhan Asqar
2018 jyly A. Baıtursynov atyndaǵy Qostanaı memlekettik ýnıversıtetin jýrnalıstıka mamandyǵy boıynsha támamdaǵan. Ár jyldary oblystyq Qostanai, respýblıkalyq Astana TV, «Jetinshi arna» telearnalaryndaǵy baǵdarlama jáne jańalyqtar bóliminde qyzmet etti. «QR Prezıdenti teleradıokesheninde» 2022 jyldyń mamyrynan bastap eńbek etedi. 2023 jyldan beri Kazinform agenttiginiń Ózbekstandaǵy menshikti tilshisi.