Keler jyldan bastap Ózbekstanda býkmekerlik keńselerdiń qyzmetine ruqsat beriledi

<p>TAShKENT. KAZINFORM &ndash; Ózbekstan prezıdenti Shavkat Mırzıeev &laquo;Táýekelge negizdelgen lotereıa men oıyndardy uıymdastyrý jáne ótkizý tártibin retteýdi jetildirý jónindegi sharalar&raquo; jarlyǵyna qol qoıdy, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń Tashkenttegi menshikti tilshisi Álıhan Asqar.</p>

Qujatqa sáıkes, 2025 jyldyń 1 qańtarynan bastap Perspektıvalyq jobalar ulttyq agenttiginiń lıtsenzııasyn alǵandarǵa býkmekerlik qyzmetti uıymdastyrýǵa ruqsat etiledi.

Atalǵan agenttik onlaın oıyndardy, býkmekerlik qyzmetti, sondaı-aq lotereıalardy uıymdastyrý jónindegi qyzmetti retteý jáne lıtsenzııalaıtyn ýákiletti memlekettik organ retinde aıqyndalǵan. Beriletin lıtsenzııa negizinde uıymdastyrylatyn býkmekerlik stavkalarǵa, onlaın oıyndar men lotereıalarǵa tek 18 jastan asqan ózbekstandyqtar men sheteldikter qatysa alady.

«2025 jyldyń 1 qańtarynan bastap 5 jyl merzimge onlaın oıyn, lotereıa uıymdastyratyn jáne býkmekerlik qyzmetpen aınalysatyn zańdy tulǵalar barlyq tólengen utys pen qaıtarylǵan stavkalardy shegergendegi jıyntyq tabysynyń 4 paıyzy kóleminde salyq tóleıdi», - delingen qujatta.

Bul rette býkmekerlik keńselerde bás tikkenderdiń jeke tulǵalardyń tabysyna salyq salynbaıdy. Perspektıvalyq jobalar ulttyq agenttiginiń túsindirýinshe, bul sharalar azamattardyń quqyǵy men múddesin qorǵaýǵa, oıynǵa degen táýeldiliktiń aldyn alýǵa jáne kúresýge, eldegi qarajattyń syrtqa ketýin toqtatýǵa baǵyttalǵan.