«Kel, sóıleseıikke» keletinder kóp: Óskemende balalar da, qarttar da baratyn til klýby bar
Qurylǵanyna eki jyldan asty
«Kel, sóıleseıik!» klýby 2022 jyly qurylǵan. Alǵashynda til janashyrlary erikti túrde ózge ult ókilderine aýyzeki sóıleý tilin úıretti. Keıinnen qatarǵa kásibı til mamandary qosylyp, klýbtyń damýyna óz úlesin qosqan. Klýbta til úıretýdiń ártúrli ádis-tásilderi qoldanylady. Eki jyldyń ishinde jalpy sany 600 adam qazaq tilin úırenýge nıet tanytqan.
«Aýyzeki sóıleý alańy bolǵandyqtan alǵashqy jyly qatysýshylarǵa qatań tártip bolǵan joq. Sabaq erkin formatta, oıyn túrinde ótti. Ár sabaq jańa taqyrypty qamtyǵandyqtan jańadan qosylǵandarǵa barlyǵy túsinikti boldy. Kúndelikti turmysqa qatysty taqyryptar ár sabaqta qozǵalyp otyrady», - deıdi O.Bókeı atyndaǵy qalalyq kitaphana dırektorynyń orynbasary Janat Jıenbekova.
Sóılesý alańy 2 jylda oń nátıje kórsete bastaǵan soń, ózgelerge úlgi bolý maqsatynda «Kel, sóıleseıik!» klýbynyń qalalyq vıktorına saıysy uıymdastyryldy. Bul jaz boıy Óskemen turǵyndarynyń jaıly demalys ornyna aınalǵan Arbatta ótti. Ár ıntellektýaldyq saıysta oza shapqan jeńimpazdar qala kúnine oraı uıymdastyrylǵan fınalda ózara baq synady. Osy sóz saıysynda qazaq tilin meńgergen 2 úıirme qatysýshysy júldeli oryndardy jeńip aldy. Egor esimdi úıirmeniń turaqty qatysýshysy osy joly da óz bilimin kórsetip, jeńis tuǵyrynan kórindi. Ata-anasy da tildi joǵary deńgeıde úırenýge nıet bildirip, ári qaraı úıirme sabaǵyn qaldyrmaı oqyǵanyn qalaıdy.
«Ótken jyldyń qyrkúıek aıynda áleýmettik jeli arqyly habarlandyrýdy kózimiz shalyp qaldy. Kitaphanada qazaq tilin úıretetin klýbqa qabyldaý júrip jatyr eken. Soǵan jazylyp, qazan aıynan ulym ekeýimiz qatysa bastadyq. Egordy osyǵan deıin basqa túrli til ortalyqtaryna, úıirmelerge aparǵanmyn. Biraq baǵdarlamasy aýyrlaý soqty. Al «Kel, sóıleseıik!» klýby oǵan birden unady», - deıdi oqýshynyń anasy Irına Egorova.
Osylaısha, anasy men balasy birge qazaq tilin úırenip júr. Úıde bir-birine qazaqsha sóılep, tilderin jattyqtyrady.
«Bizde ár sabaq ártúrli ótedi. Oıyn túrinde de bolady. Maǵan óte unaıdy. Mereke kúnderinde kontsert qoıyp, óner kórsetemiz. Ózim óleń oqyp, án aıtqandy jaqsy kóremin. Qazaqtyń ulttyq kıimderin kıip shyǵamyn», - deıdi 9 jasar Egor Býnkov.
Anasynyń aıtýynsha, olar klýbqa mektepte jaqsy baǵa alý úshin emes, memlekettik tildi úırenip, kúndelikti ómirde qoldaný úshin barady.
«Ulym til bilse jańa dostar taýyp, damı túsedi dep senemiz. Klýb sabaqtaryna qalmaı barýǵa tyrysamyz. Egor ózi de taǵatsyzdanyp kútip júredi. Sabaq ýaqytynda týystarymyz, dostarymyz qonaqqa shaqyrsa da barmaımyz. Sebebi qazaq tilin úırený – bizdiń negizgi maqsattarymyzdyń biri», - deıdi Irına Egorova.
Qatysýshylar eki topqa bólindi
Bıyldan bastap azamattar til bilý deńgeıine qaraı eki topqa bólingen. Oǵan sebep - osy ýaqytqa deıin turaqty til úırenýshilerdiń deńgeıiniń artýy. Sondaı-aq Óskemen qalasyndaǵy JEO, «Óskemen Vodakanal» KMK, SES qyzmetkerlerimen birge, qatarǵa ákimdik mamandary qosylǵan. Qaladaǵy memlekettik basqarmalar da osy jyldan bastap qazaq tilin úırenýge ynta tanytty. Sonymen qatar «Juldyz» óner mektebiniń ishinde «Kel, sóıleseıik!» klýbynyń keńsesi ashyldy.
Memlekettik qyzmetkerlerge til úıretýge kúsh salyp kele jatqandardyń ishinde qazaq tili men ádebıeti pániniń muǵalimi, qalalyq máslıhat depýtaty Nadejda Shýshanıkovanyń orny bólek.
«Bala kúnnen ustaz bolýdy armandadym. Biraq naqty osy joldy tańdaımyn dep 7-synypqa kelgende sheshtim. Aldyma qazaq tili pániniń muǵalimi bolamyn dep maqsat qoıdym. Áıteýir kóp jylǵy eńbektiń arqasynda sol maqsatyma jettim. «Kel, sóıleseıik» qazaq tildi klýbynda sabaq berýge usynys túskende til janashyry bolǵandyqtan esh oılanbastan kelisimimdi berdim. Qazaq elinde turatyn ár adam memlekettik tildi bilýi tıis dep oılaımyn», - deıdi ol.
Oralhan Bókeı atyndaǵy qalalyq kitaphanyń Óskemenniń túkpir-túkpirinde 13 fılıaly bar. «Kel, sóıleseıik» klýbynyń sabaqtary solardyń árqaısysynda ótedi. Ár muǵalimniń, erikti jastardyń sabaq ótkizý ádistemesi ártúrli. Kitaphananyń bólmeleri tar fılıaldarynda 7 adamǵa deıin oqı alady. Al ortalyq kitaphanada 20-dan astam qatysýshy syıady.
«Balalarǵa, eresekterge arnalǵan toptar bólek. Qazaq tilinde kontent júrgizetin bloger Vasılıı Berezovskıı klýbtyń damýyna óz úlesin qosyp keledi. Jarty saǵatta jańa taqyrypty túsindirip, qalǵan jarty saǵatta túsingenderin bekitedi. Sabaq ótkizý barysy qabyldaýǵa jeńil, kreatıvti oılardan turady. Ablaketka shaǵyn aýdanyndaǵy kitaphananyń 6-fılıalyna otbasymen kelip qatysatyndar bar. «Kel, sóıleseıik!» klýbynyń mamandary ádeıi uıymdastyrmasa da sabaqtar otbasylyq formatta júrip ketti. Bul úıde de sabaqta úırengenderdi pysyqtaýǵa óte yńǵaıly», - deıdi kitaphana dırektorynyń orynbasary J.Jıenbekova.