Kedenshiler 52 mln. teńgeni quraıtyn kontrabandalyq taýardyń jolyn kesti

ASTANA. 10 qazan. QazAqparat - Qazaqstan Respýblıkasy Qarjy mınıstrligi Kedendik baqylaý komıteti Kontrabandaǵa qarsy kúres basqarmasynyń qyzmetkerleri jalǵan qujattardy paıdalaný arqyly elimizdiń aýmaǵyna taýarlardy kontrabandalyq jolmen ákelý faktisin anyqtap, qylmystyń jolyn kesti. Bul týraly Kedendik baqylaý komıtetiniń baspasóz qyzmetinen habarlandy.

Keltirilgen derekterge qaraǵanda, halyq tutynatyn taýarlar Túrkııadan Qazaqstan azamatynyń atyna ákelinip, Jambyl oblysyndaǵy Kedendik baqylaý departamentiniń qyzmet aımaǵynda resimdelgen. Al Túrkııa keden organdarynan alynǵan eksporttyq deklaratsııalardy oblystyq keden departementinde resimdelgen ımporttyq deklaratsııalarmen salystyrǵan kezde málimdelgen kedendik qunda, ataýynda jáne resimdelgen taýarlardyń sanynda eleýli aıyrmashylyqtar anyqtalǵan.

«Mamandar qorytyndysyna sáıkes deklaratsııalanbaǵan taýarlardyń kedendik qunynyń somasy 51 mln. 957 myń 135 teńgeni qurady, nátıjesinde memleketke keltirilgen zııannyń somasy 18 mln. 796 myń. 168 teńgege jetip otyr. Osyǵan oraı, ekonomıkalyq kontrabanda faktisi boıynsha qylmystyq is qozǵalyp, tergeý júrgizilýde», - delingen baspasóz baıanynda.

Toqtala ketetin jaıt, aǵymdaǵy jyl basynan beri Qazaqstan Respýblıkasynyń keden organdary ekonomıkalyq kontrabanda faktisi boıynsha 375 qylmystyq is qozǵaǵan. Qozǵalǵan qylmystyq ister boıynsha taýarlardyń jalpy somasy 9 mlrd. 565 mln. teńgeni qurap, memleketke 832 mln. teńge somasyna zııan keltirilgeni belgili boldy.