Kedendik tólemderden jaltarǵan kásipker memleketke 18,8 mln teńge tóledi

TALDYQORǴAN. QazAqparat - Qytaıdan 9 júk kóligine tıelgen taýarlardy Almaty oblysyndaǵy «Nur Joly» keden organy arqyly ótkizbek bolǵan kásipkerdiń qylmysy áshkere boldy. Tekserý barysynda ol kedendik tólemderdi tóleýden jaltarǵan, dep habarlaıdy QazAqparat tilshisi.

QR Qarjy mınıstrligi Memlekettik kirister komıteti baspasóz qyzmettiń málimetinshe, kedendik tólemderdi tóleýden jaltarǵan kásipker óz kinásin moıyndap, 18,8 mln. teńge kóleminde kedendik tólemder men salyqtardy tólegen.

«2019 jyldyń 20 naýryzynan 1 sáýirge deıingi aralyqta ártúrli ataýy bar taýarlarmen 9 kólik Eýrazııalyq ekonomıkalyq odaqtyń keden aýmaǵyna Qytaı Halyq Respýblıkasynan Almaty oblysyndaǵy «Nur Joly» keden organy arqyly keldi.Tekserý jáne tekserý keshenin (IDC) paıdalana otyryp, kedendik baqylaý kezinde «Nur Joly» keden beketiniń qyzmetkerleri ákelingen taýarlardyń ataýy men sanyna kúmán keltirdi.

Keıinnen ótkizilgen tehnıkalyq tekserýlerdiń negizinde IDK-ny qoldaný jáne ınspektsııalyq táýekel profılderin engizý arqyly «A» JShS-ne jiberilgen taýarlardyń tekserýi júrgizildi. Kedendik tekserý nátıjeleri boıynsha taýarlardy durys emes deklaratsııalaý faktileri anyqtaldy.

Jasalǵan esepteýlerge sáıkes, kedendik deklaratsııalarda jalǵan aqparat jarııalanǵan taýarlardyń jalpy kedendik quny 72,9 mln. teńgeni qurady, al kedendik tólemder men salyqtardyń jalpy somasy 18,8 mln. teńge boldy», delingen vedomstvo taratqan aqparatta.

Artynsha qylmystyq is qozǵalǵan. Biraq kásipker kórsetilgen tólemderdi tolyqtaı tólep, isti toqtatýdy ótingen.

«Almaty oblysy boıynsha Ekonomıkalyq tergeý departamenti júrgizgen tergeý barysynda «A» JShS dırektory kedendik tólemderdi tóleýden jaltarý faktisi boıynsha kináli dep tanylǵan, Qazaqstan Respýblıkasy Qylmystyq kodeksiniń 236-babynda kózdelgendeı, ol óziniń isine shyn júrekten ókinip, bıýdjetke 18,8 mln. teńge mólsherinde tıisti kedendik tólemder men salyqtardy tolyq tóledi jáne QR QK 68 babynyń 3 bóligin qoldanýǵa baılanysty sotqa deıingi is júrgizý satysynda qylmystyq isti toqtatý týraly ótinish jasady. Joǵaryda atalǵan mán-jaılarǵa sáıkes QR QPK jáne QK normalaryn basshylyqqa ala otyryp, tergeýshiniń qaýlysymen «A» JShS-niń dırektoryna qatysty kedendik bajdardy, salyqtardy tóleýden jaltarý týraly aldyn ala tergeý QR Qylmystyq kodeksiniń 236-babynyń 1-bóligi boıynsha toqtatyldy», dep málimdedi memlekettik kirister komıtetindegi baspasóz qyzmeti.