Kedendik odaqtyń syrtqy shekarasynda kóliktik baqylaýdy júzege asyrý máselesine arnalǵan keńes ótedi

ASTANA. 9 sáýir. QazAqparat - 2013 jylǵy 11 sáýirde Kólik jáne kommýnıkatsııa mınıstrliginiń ǵımaratynda Kedendik odaqtyń syrtqy shekarasynda kóliktik baqylaýdy júzege asyrý máselesine arnalǵan Kedendik odaq elderiniń memlekettik organ ókilderiniń keńesi ótedi. Bul týraly atalmysh mınıstrliktiń baspasóz qyzmetinen habarlandy.

Keńes aıasynda taraptar halyqaralyq avtomobıl tasymalyn júzege asyrý barysynda kezdesetin kedergilerdi taldaý, ár elde odaq elderi aýmaǵy arqyly tranzıtpen júrip ótetin kólik quraldary týraly málimetter bazasyn engizý sekildi birqatar máselelerdi talqylaý kózdeledi. Budan basqa, qazaqstandyq tarap keńeske qatysýshylardy jańa Ahýaldyq ortalyqtyń jumysymen tanystyrady. Ahýaldyq ortalyqtyń basty maqsaty - kóliktik baqylaý júıesiniń tıimdiligin arttyrý, sybaılas jemqorlyq kórinisterin boldyrmaý, ákimshilik kedergilerdi joıý. Ahýaldyq ortalyq kóliktik baqylaý beketteriniń, tehnıkalyq qyzmet kórsetý ortalyqtarynyń qyzmetine baqylaý júrgizýge jáne avtokólik quraldarynyń salmaq parametrlerin qozǵalys barysynda ólsheýge, ruqsat blankilerin berý úderisin avtomattandyrý jáne monıtorıng júrgizýge múmkindik beretin 4 júıemen jabdyqtalǵan.

Shara aıasynda Eýrazııalyq ekonomıkalyq komıssııasynyń energetıka jáne ınfraqurylym mınıstri D.Ahmetovtiń qatysýymen brıfıng ótkizý kózdelgen.