Kedendik odaqta Qazaqstannyń eksporty artyp keledi - QR Statıstıka agenttigi

ASTANA. 15 mamyr. QazAqparat - Búginde Kedendik odaq aımaǵynda Qazaqstannyń eksporty ósip, ımporty tómendep keledi.

Bul týraly búgingi baspasóz máslıhatynda QR Statıstıka agenttiginiń tóraǵasy Álıhan Smaıylov málim etti.

Onyń habarlaýynsha, qańtar-naýryz aılarynda Kedendik odaq ishindegi ózara saýda-sattyqtyń jalpy kólemi 5 mlrd. 112 mln. dollardy qurady. Bul ótken jyldyń atalǵan kezeńimen salystyrǵanda, 5 paıyzǵa tómen. «Soǵan qaramastan, Kedendik odaqta Qazaqstannyń eksporty 4,6 paıyzǵa ósip, 1 mlrd. 649 mln. dollarǵa kóterildi. Al ımport 8,8 paıyzǵa azaıdy. Búginde ol kórsetkish 3 mlrd. 462 mln. dollardy qurap otyr. Demek, odaqqa múshe eldermen júrgizip jatqan ózara saýda-sattyq salasynda biz úshin oń ózgeris baıqalyp jatyr. Eksport ósip, ımport tómendep keledi», - deıdi Á.Smaıylov.