Kedendik odaq offshorǵa qarajat aýdarý úshin ońtaıly tásimge aınalyp arady - G. Qaraǵusova

ASTANA. 23 qyrkúıek. QazAqparat - Kedendik odaq aýmaǵy offshorǵa qarajat aýdarý úshin ońtaıly tásimge aınalyp barady. Óıtkeni, Kedendik odaqqa qatysýshy-memleketter aýmaǵynda shekaralyq baqylaýdyń bolmaýy osyǵan jaǵdaı jasap otyr. Bul týraly búgin Májiliste ótken Úkimet saǵatynda Qarjy jáne bıýdjet komıtetiniń tóraıymy, depýtat Gúljan Qaraǵusova málim etti.

«Sondyqtan da, dál osy olqy tusty paıdalanatyn jalǵan eksportshylardy baqylaý asa qıynǵa soǵyp turǵany aıqyn. Sondyqtan da, búgingi tańda memleketústilik deńgeıde, onyń ishinde Qazaqstan, Reseı men Belarýs arasyndaǵy kedendik organdardyń aqparattyq ózara árekettesýi qajettigi asa ózektige aınalyp barady. Al mundaı ózara baılanystyń bolmaýy taýarlar deklaratsııasynyń sapasyna da, shekaradaǵy taýardy rásimdeýge ketetin ýaqyttyń sozylýyna da áser etpeı qoımaıdy», - deıdi G. Qaraǵusova.

Sondaı-aq depýtat Reseı DSU músheligine qatysty moınyna alǵan mindetterge saı kedendik tarıfterdi retteıtinin eske sala kele, Qazaqstannyń da DSU tabaldyryǵynda turǵanyn jetkizdi. «Al bul baǵytta kedendik rásimdeýler barysynda alaıaqtyqqa jol bermeý úshin, biryńǵaı taýarlar tobyna mólsherlemeni birizdendirýge muqııat nazar aýdarý qajet», - dedi depýtat.