Kedendik odaq aıasynda 400-den asa taýarlarǵa birińǵaı kedendik ımport tarıfin qoldaný úshin 3-5 jyl arasynda ótpeli kezeń qarastyrylyp otyr - J. Aıtjanova
Máselen, Qazaqstan búgingi kúni dári-dármekti jáne medıtsınalyq quraldardy shetelden 5 jylǵa deıin 0 paıyzdyq ımporttyq baj salyǵymen alyp kele alady. Búgin QR Parlamenti Májilisinde «Keden odaǵyndaǵy salyqty jáne kedendik ákimshilendirý týraly» taqyrypta ótken Úkimet saǵatynda QR Indýstrııa jáne saýda vıtse-mınıstri Janar Aıtjanova osylaı málim etti, dep habarlaıdy QazAqparat.
Vıtse-mınıstrdiń aıtýynsha, bunymen qosa hımııalyq óndiriste qoldanylatyn shıkizattar men polımerler shetelderden tórt jyldyń ishinde 0 paıyz deńgeıindegi ımportyq bajben alyp kelinedi. Al osy tórt jyldyń ishinde Atyraý munaı jáne gaz- hımııa zaýyty qurylysyn aıaqtaý josparlanǵan. «Ótpeli kezeń ishinde jeńildetilgen kedendik baj ben ımporttalatyn taýarlar tizbesine sonymen qatar, temirjol vagondary, azyq-túlik ónimderin jáne qaǵaz shyǵaratyn kásiporyndar paıdalanatyn shıkizat kirip otyr. Bunymen qosa, Qazaqstan ekonomıkasynyń jedeldetilgen ındýstrııalandyrý baǵdarlamasyn júzege asyrý maqsatynda ınvestıtsııalyq sharalar qoldanylatyn bolady. Basqasha aıtqanda, otandyq kásiporyndar óz taýarlary men qyzmetterin shyǵarý úshin qajetti qural-jabdyqtardy jáne shıkizat ónimderin shetelderden ınvestıtsııalyq kelisimshart sheńberinde 0 paıyz baj salyǵymen ımporttaı alady», dedi J. Aıtjanova.
Onyń aıtýynsha, bul maqsatta qoldanystaǵy ınvestıtsııalar týraly zańǵa ózgerister engiziledi. Naýryz aıynda Indýstrııa jáne saýda mınıstrligi bundaı ózgerister engizilgen zań jobasyn Májiliske usynbaqshy. «Atalǵan ózgerister boıynsha qural-jabdyqtarmen qosa, shıkizatty jáne basqa da qajettti materıaldardy shetelden ımporttaý úshin jeńildikter qarastyrady. Buǵan qosa jeńildetilgen tártipte áýe ushaqtary jáne júk tasýshy kólikterdi ımporttaý múmkindigi de qarastyrylady», dedi J. Aıtjanova.