Kedendik baqylaý komıteti qyzmetkerleriniń 90 paıyzy attestatsııadan aıyrylady - B. Jámishev
Bul týraly búgin Astanada Elbasy Joldaýyn nasıhattaý boıynsha respýblıkalyq aqparattyq-nasıhattyq top músheleriniń turǵyndarmen kezdesýi barysynda QR Qarjy mınıstri Bolat Jámishev málim etti.
«Elbasynyń tapsyrmasy boıynsha elimizde attestatsııa júrgiziletini belgili. Quqyq qorǵaý organdaryndaǵy arnaıy shen men pogon taǵýdy talap etpeıtin laýazymdaǵy birqatar qyzmetkerlerdiń attestatsııasy qaıtarylyp alynady dep kútilýde. Aqparat úshin aıta keteıin, Kedendik baqylaý komıteti 90 paıyzǵa attestatsııadan aıyrylatyn bolady. Kedendik baqylaý komıteti bul - fıskaldy organ. Qyzmetkerlerdiń tek 10 paıyzy ǵana jedel-izdestirý qyzmetin atqarady. Sondyqtan jaqyn ýaqytta qyzmetkerlerdiń qalǵan 90 paıyzy attestatsııadan aıyrylady», - dep atap ótti B. Jámishev.
Onyń aıtýynsha, bul qadam Elbasy Joldaýynda quqyq qorǵaý organdarynyń qyzmetin jáne Qazaqstannyń sot júıesin damytý tapsyrmasyna sáıkes oryndalmaq.