Kedendegi quqyqbuzýshylyqtardyń somasy úsh jylda 165 mlrd teńge boldy

NUR-SULTAN. QazAqparat - Memlekettik kirister komıteti Bas prokýratýra janyndaǵy vedomstvoaralyq toptyń quramymen syrtqy ekonomıkalyq qyzmetke qatysýshylardyń, sondaı-aq Qytaı Halyq Respýblıkasymen shekaralas ótkizý pýnktteriniń qyzmetine birlesken tekserý júrgizdi, dep habarlaıdy QazAqparat.

Vedomstvonyń málimetinshe, shara barysynda 9 ýákiletti ekonomıkalyq operator men 1 fılıaly kóshpeli kedendik tekserýlerdi aıaqtady, qosymsha esepteý somasy 107 mlrd teńgeni qurady. Sondaı-aq, 58 mlrd.teńgege salyq tóleýden jaltarý derekteri anyqtaldy.

«Úsh jyl ishindegi buzýshylyqtardyń jalpy somasy - 165 mlrd teńge. Budan basqa, 398 mlrd teńgege jalǵan elektrondyq shot-faktýralardy jazyp berý belgileri bar. Aldyn ala shyǵyn somasy – 128 mlrd.teńge. Materıaldar qylmystyq is qozǵaý máselesin qaraý úshin quqyq qorǵaý organdaryna berildi. Sonymen qatar 151 ımporttaýshynyń jalǵan elektrondyq shot-faktýralar jazyp berý belgileri boıynsha materıaldary qarjy monıtorıngi agenttigine jiberildi», - delingen komıtet habarlamasynda.

Bul buzýshylyqtar Memlekettik kirister komıtetiniń aqparattyq júıeleriniń arqasynda anyqtalǵan, olardyń bazasynda taýarlardy ımporttan bólshek saýdadaǵy eksportqa deıin qadaǵalaý júıesi jumys isteıdi. Búginde kedendik deklaratsııalardyń 100%-y elektrondy túrde beriledi, syrtqy ekonomıkalyq qyzmetke qatysýshylar keıinnen ákimshilendirý kezinde paıdalanylatyn málimetterdi derbes málimdeıdi.