Keden odaǵynyń erkin ekonomıkalyq aımaqtary týraly kelisim ózgeristeri ratıfıkatsııalandy
Májiliste «2010 jylǵy 18 maýsymdaǵy Keden odaǵynyń kedendik aýmaǵyndaǵy erkin ekonomıkalyq aımaqtar jáne erkin kedendik aımaqtyń kedendik rásimi máseleleri jónindegi kelisimge ózgerister engizý týraly hattamany ratıfıkatsııalaý týraly» zań jobasy talqylandy.
«2018 jyly 1 qańtarda Eýrazııalyq ekonomıkalyq odaqtyń jańa Keden kodeksi kúshine endi. Jańa kodeksti eskere otyryp, múshe memleketterdiń barlyq qajetti normatıvtik-quqyqtyq qujatyn ózektendirý qajet boldy. Osyǵan oraı 2021 jyldyń 19 qazanynda Máskeýde Eýrazııalyq ekonomıkalyq odaqtyń 5 eliniń basshylary arnaıy ekonomıkalyq aımaqtar boıynsha kelisimge ózgerister engizý týraly hattamaǵa qol qoıdy», - dedi Indýstrııa jáne ınfraqurylymdyq damý mınıstri Marat Qarabaev.
Hattamada zańdyq jáne redaktsııalyq sıpattaǵy ózgerister engizý, onyń ishinde Eýrazııa ekonomıkalyq odaǵynyń Keden kodeksiniń normalaryna sáıkes negizgi termınologııa men kedendik retteý máselelerin sáıkestendirý kózdelgen.
«Tutastaı alǵanda, eń basty úsh ózgeris engizilip otyr. «Keden odaǵynyń komıssııasy» degen uǵym osy zań jobasynyń mátini boıynsha «Eýrazııalyq ekonomıkalyq komıssııa» degen sózben, «Keden odaǵyna múshe memleket aýmaqtary» degen uǵym «Eýrazııalyq ekonomıkalyq odaqqa múshe memlekettiń aýmaqtary» degen uǵymmen aýystyrylyp jatyr. Ekinshiden, AEA rezıdentteri buǵan deıin rezıdenttigin tirkegen soń mindetti túrde jarııalaýymyz qajet edi. Biraq qaı jerde, qandaı aqparat quraldarynda jarııalaý tetigi bekitilmegen. Jańa zańǵa sáıkes, qaı kásiporynda rezıdent bolsa, sol odaqtyń resmı saıtynda jarııalaý qajettigi naqty kórsetilgen», - dep túsindirdi mınıstr.
Úshinshiden, erkin keden aımaǵynyń kedendik rásimin retteýge ıaǵnı Eýrazııalyq ekonomıkalyq odaǵynyń Keden kodeksine jáne daýlardy sheshý boıynsha osy odaqtyń shartyna silteme engizilgen.
Mınıstrdiń aıtýynsha, kelisimdi ratıfıkatsııalaý týraly zańnyń qabyldanýy teris quqyqtyq, áleýmettik-ekonomıkalyq jáne ekologııalyq saldarǵa ákep soqpaıdy.
Nátıjesinde zań jobasyn qatysyp otyrǵan 96 depýtattyń 90-y maquldady, 2 depýtat qarsy bolyp, 4 depýtat qalys qaldy. Kópshilik daýyspen sheshim qabyldandy.