Keden odaǵy qurylǵaly beri Qazaqstanda avtokólik óndirisi 24 esege artty

ASTANA. QazAqparat - Keden odaǵy elderimen Qazaqstannyń taýar aınalymy 24 mlrd. dollarǵa jetti. Bul týraly búgin Ortalyq kommýnıkatsııalar qyzmetindegi brıfıngte QR Ekonomıka jáne bıýdjettik josparlaý mınıstrligi Halyqaralyq ekonomıkalyq ıntegratsııa departamentiniń dırektory Ernar Bakenov málim etti.

«2009-2013 jyldar aralyǵynda KO men BEK aıasynda seriktes memlekettermen Qazaqstannyń taýar aınalymy 88 paıyzǵa artyp, 24 mlrd. dollarǵa jetti. Sonymen qatar KO elderine eksport kólemi 62 paıyzǵa ósti», - dedi departament basshysy. Belgili bolǵandaı, KO elderine Qazaqstan eksportynyń jalpy kóleminde óńdelgen taýarlar eksportynyń úlesi 44 paıyzdan 54 paıyzǵa deıin artty. Sonymen qatar kondıterlik ónimder eksporty 3 esege, transformatorlar eksportynyń kólemi 11 esege, Reseı men Belarýs elderine shaǵyn tonnalyq júk mashınalarynyń jetkizilimi 15-17 esege ósti. Akkýmýlıatorlar boıynsha KO elderine eksport 1,7 esege, kondensatorlar 1,3 esege, sýsyndar 13 esege artty. «Keden odaǵy qurylǵaly beri avtokólik quraldarynyń óndirisi 24 esege ósip, qazirgi kezde óndiristiń jalpy kólemi 40 myńnan astam danaǵa jetti», - dedi E.Bakenov.