Keden odaǵy aýmaǵyna kiretin avtomobılderdi baqylaýdyń biryńǵaı tásilderi júzege asady - Zań jobasy

ASTANA. 16 mamyr. QazAqparat - Búgin QR Parlamenti Májilisiniń jalpy otyrysynda palata depýtattary «Keden odaǵynyń syrtqy shekarasynda kóliktik (avtomobıldik) baqylaýdy júzege asyrý týraly kelisimdi ratıfıkatsııalaý týraly» zań jobasyn maquldady. Qujat endi Parlament Senatyna jiberiledi.

Atalǵan kelisim Keden odaǵyna qatysatyn kez kelgen memlekettiń aýmaǵyna kiretin (shyǵatyn, tranzıtpen ótetin) kólik quraldaryn baqylaýdy júzege asyrýdyń biryńǵaı tásilderin aıqyndaıtyn bolady. Buǵan sáıkes, syrtqy shekaradan kirý nemese shyǵý kezinde kóliktik baqylaý boıynsha is-qımyldardyń naqty tizbesi anyqtalady. Baqylaý qujattary quzyrly organdarmen ózara tanylatyn bolady jáne olardyń ortaq úlgisi bekitiledi. «Sondyqtan da, kelisimdi qabyldaý Keden odaǵy aýmaǵynda biryńǵaı avtokólik quraldarynyń júrisin jeńildetedi. Sonymen qatar, tekserý nátıjeleri aqparattyq júıe arqyly kólik quraly bara jatqan elderdiń quzyrly organdaryna jiberiledi. Zańnama talaptaryn oryndamaǵan tasymaldaýshylar boıynsha tıisti habarlama beriledi. Budan bólek, habarlamaǵa qandaı ruqsat qajettigi, zańǵa qaıshy keletin eskertýler týraly aqparat ta kiredi», - deıdi Kólik jáne kommýnıkatsııa mınıstri Asqar Jumaǵalıev.

Mınıstrdiń aıtýynsha, Keden odaǵy aıasyndaǵy úsh el arasynda aqparattyq almasýdy uıymdastyrý syrtqy shekarada avtokólikterdiń turyp qalmaýyna múmkindik beredi. Bul rette kelisimdi oryndaý úshin taraptar birlesken komıssııa quratyn bolady.