Keden qyzmetindegi sybaılas jemqorlyqtyń sebep-saldary talqylandy
Bul jaıynda Memlekettik hatshy Qyrymbek Kósherbaevtyń tóraǵalyǵymen ótken QR Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komıssııanyń otyrysynda belgili boldy.
Memlekettik hatshy Táýelsizdik alǵannan beri Qazaqstannyń Tuńǵysh Prezıdenti – Elbasy N.Á.Nazarbaev keden qyzmetin memleket qurý isindegi mańyzdy salalardyń biri retinde erekshe kóńil bólgenin atap ótti.
Sodan bergi ýaqytta zańnamalyq jáne uıymdastyrý turǵysynda qyrýar jumys atqaryldy, zamanaýı kedendik ınfraqurylym jasaldy.
Degenmen, atalǵan salada aıtarlyqtaı damý bolǵanymen, keden qyzmetindegi barlyq problema túbegeıli sheshildi deı almaımyz.
Osy oraıda Memleket basshysy Qasym-Jomart Kemeluly Toqaev kedendik júıeniń tıimdiligin arttyryp, odan túsetin tabysty kóbeıtýdi tapsyrdy.
Keden salasyn jetildirý maqsatynda elektrondy deklaratsııa tapsyrý jumysy jetildirildi, táýekelderdi basqarý júıesi engizildi, basqa organdardyń aqparat júıelerimen ıntegratsııa ornatylyp, qujat almasý, uıymdastyrý isi jolǵa qoıyldy.
Keden salasyna qatysty zańnamany jetildirý baǵytynda memleket shekarasynda zańsyz saýda aınalymyna qarsy is-qımyldyń keshendi jospary qabyldanyp, Kóleńkeli ekonomıkaǵa qarsy is-qımyl jónindegi 2021-2023 jyldarǵa arnalǵan keshendi is-sharalar josparynyń jobasy ázirlendi.
Sybaılas jemqorlyqqa qarsy, Qarjylyq monıtorıng agenttikteriniń, Bas prokýratýranyń, «Atameken» ulttyq kásipkerler palatasynyń, Qarjy mınıstrliginiń basshylary atalǵan saladaǵy sybaılas jemqorlyq jáne basqa da zań buzýshylyq áreketterdi anyqtaý jóninde, kinálilerdi zańda belgilengen tártippen jaýapqa tartý baǵytynda qabyldanyp jatqan sharalar jaıynda baıandady.
Sonymen qatar otyrys barysynda kedendik protsesterdi tsıfrlandyrý, bıýdjet kirisin arttyrý, atalǵan saladaǵy sybaılas jemqorlyqtyń sebebi men saldary sekildi máseleler talqylandy.
Komıssııada Prezıdenttiń kómekshisi – Qaýipsizdik Keńesiniń Hatshysy Áset Isekeshev kedendik baqylaý isin óz deńgeıinde uıymdastyrý jáne sala jumysyn jaqsartý jónindegi usynystaryn ortaǵa saldy.
Jıynda halyqaralyq tájirıbedegi kedendik basqarý isine engizilip jatqan ozyq tehnologııalar, onyń ishinde, syrtqy ekonomıkalyq qyzmetke jumyldyrylǵan derekqorlardy tsıfrlandyrý men proaktıvti ıntegratsııalaý máseleleri kóterildi.
Komıssııa otyrysynda keden salasyndaǵy ekonomıkalyq ósimniń tómendeýine jáne zańdy kásipkerlik qyzmetine jıi kedergi keltiretin kemshilikterdi joıý máselesine mán berildi. Muny sheshý úshin keden qyzmeti men kásipkerler arasyndaǵy ózara is-qımyl tetikterin ázirleý, sondaı-aq, kedendik quqyq buzýshylyqtarǵa yqpal etetin jaýapsyz qyzmetkerlerdi anyqtaý, quqyq qorǵaý qyzmetiniń tıimdiligin arttyrý týraly usynystar aıtyldy.
Jıyn qorytyndysy boıynsha naqty usynystar ázirlenip, ony oryndaý Qarjy mınıstrligine, tıisti memlekettik organdarǵa tapsyryldy.
Komıssııa otyrysynyń sońynda QR Memlekettik hatshysy Qyrymbek Kósherbaev kún tártibinde qaralǵan máselege qatysty naqty tapsyrmalar berip, onyń oryndalýy qatań baqylaýda bolatynyn málimdedi.