QDB óziniń nesıe saıasatyna ózgerister engizdi
Bank ókilderiniń aıtýynsha, aqparattyq ashyqtyqty arttyrý maqsatynda QDB AQ ákimshiliktendirýi jáne qarjylandyrýyndaǵy jobalar týraly jalpyǵa qoljetimdi aqparat bazasyn keńeıtken kórinedi. Budan bylaı kez-kelgen azamat https://www.kdb.kz siltemesi arqyly ótip, banktiń saıtynda qarjylandyrýdyń negizgi sharttary týraly barynsha tolyq aqparatpen tanysa alady. Onda qarjylandyrýdyń somasy, merzimi, valıýtasy, syıaqy mólsherlemesi jáne qaryz alýshynyń ataýy jáne jobalar boıynsha jalpy málimetpen (jobanyń ataýy men sıpattamasy, qarjylandyrý kózderi, joba quny men qaryz alýshynyń nemese úshinshi tulǵalardyń jobany qarjylandyrýǵa jeke qatysýynyń mólsheri) bilýge bolady.
2016 jyly qazanda bekitilgen QDB nesıe saıasaty týraly Memorandýmnyń jańa redaktsııasyna sáıkes Bank ınvestıtsııalyq jobalardy qarjylandyrý «shegin» 30 mln AQSh dollarynan 7 mlrd teńgege deıin, tamaq ónerkásibi úshin - 10 mln AQSh dollarynan 3 mlrd teńgege deıin, eksporttyq operatsııalar úshin - 5 mln AQSh dollarynan 1 mlrd teńgege deıin tómendetti.
2016 jyldyń qorytyndysy boıynsha jobalar men baǵdarlamalardy qarjylandyrýdyń jalpy kólemi 426 mlrd teńgeni qurady. Búgingi tańda bank tarıhynda bul soma rekordtyq kórsetkish bolyp tabylady. Eseptik kezeńde tikeleı nesıeleý aıasynda Damý Banki jalpy 277,5 mlrd teńge somaǵa shıkizattyq emes salalar kásiporyndarynyń 14 ınvestıtsııalyq jobasy men 10 eksporttyq operatsııasyn qarjylandyrdy. Bul QDB-niń ekonomıkanyń shıkizattyq emes sektor kásiporyndaryn nesıeleýge bir jylda bergen uzaq merzimdi qaryzdarynyń kólemimen salystyrǵanda 57%-dy quraıdy.
Sonymen qatar 2016 jyly Qazaqstannyń Damý Banki elimizdiń keıbir óńirlerinde iri jobalarǵa qarajat aýdardjy. Aıta ketsek, QDB Aqtóbe qalasynda rels-arqalyq zaýytynyń qurylysyn, Taraz qalasynda jáne Ońtústik Qazaqstan oblysynda gaz taratý jelilerin jańǵyrtý, sonymen qatar Shyǵys Qazaqstan oblysynda Aqtoǵaı ken ornynda sýlfıdti ken óńdeıtin taý-ken baıytý fabrıkasynyń qurylysy sııaqty iri jobalardy qarjylandyrdy.
Óz kezeginde aǵymdaǵy jyldyń tórt aıynyń qorytyndysy boıynsha QDB qarjylandyrýǵa jalpy 346 mlrd teńge qaryzdar somasyna 6 jobany maquldady, olardyń ishinde Shymkent MÓZ-in jańǵyrtý jáne jóndeý, sondaı-aq Astana halyqaralyq áýejaıynyń jolaýshylar termınalyn jóndeý sııaqty mańyzdy jobalar bar. Budan ózge, banktik saraptama kezeńinde tamaq ónerkásibi (azyq-túlik óndirisi) jáne munaı óńdeý sııaqty salalarda 2 iri joba bar.
Oǵan qosa, aǵymdaǵy jyldyń alǵashqy 4 aıynda jalpy 102,5 mlrd teńge somaǵa 7 ınvestıtsııalyq joba men 6 eksporttyq operatsııa qarjylandyryldy.
Esterińizge sala keteıik, «Qazaqstannyń Damý banki» aktsıonerlik qoǵamy 2000 jylǵy 28 jeltoqsanda Qazaqstan Respýblıkasynyń Prezıdenti Nursultan Nazarbaev №531« Qazaqstan Damý Banki týraly» Prezıdent Jarlyǵymen 2001 jylǵy 18 mamyr Qazaqstan Respýblıkasy Úkimetiniń №659 « Qazaqstannyń Damý Banki» jabyq aktsıonerlik qoǵamyn qurý týraly» Qaýlysymen sáıkes qurylǵan.