Kcell muǵalimder ınternet izdep ábigerge túsken aýyldaǵy jaǵdaıdy túsindirdi

Kcell kompanııasy Túrkistan oblysynyń Qazyǵurt aýdanyna qarasty Aqqum aýylynda ınternettiń sapasyz bolý sebebin atady, dep habarlaıdy QazAqparat tilshisi.

«Qazyǵurt aýdany Altyntóbe aýyl okrýgi Aqqum eldi mekenine 2020 jyldyń jeltoqsan aıynda Kcell operatorynyń bazalyq stantsııasy ornatylǵan bolatyn. Ókinishke qaraı, jer bederiniń kúrdeliligine jáne jerdegi transmıssııanyń bolmaýyna baılanysty – sol kezdegi baılanyspen qamtýdyń jalǵyz múmkin bolar joly spýtnık arqyly qosylý edi. Spýtnıktik transmıssııada derekterdi berý arnasy sapaly ınternet baılanysyn qamtamasyz etýge jetkiliksiz», - dep atap ótedi kompanııa agenttik tilshisiniń saýalyna oraı.

Baılanys operatory abonentteriniń jyldam ınternetke degen qajettiligin túsinetinin jáne osy baǵytta qajetti áreketterdi júzege asyryp kele jatqanyn atap ótedi.

«Naqtyraq aıtqanda, qazirgi ýaqytta jergilikti atqarýshy organmen uıymdastyrý máselelerin sheship jatyr. Baılanys operatory óz qurylǵylaryn ornatýy úshin jergilikti atqarýshy organdar ınfraqurylymmen, ıaǵnı antenna-dińgek qurylysyn salyp, ony elektr energııasymen qamtamasyz etýi tıis. Sonda ǵana baılanys operatory radıorelelik kópirdi iske asyrýǵa jáne aýyldy sapaly mobıldi ınternetpen qamtamasyz etýge múmkindik alady», - dedi kompanııadan.

Buǵan deıin Tsıfrlyq damý, ınnovatsııalar jáne aeroǵarysh ónerkásibi mınıstrligi Túrkistan oblysynda muǵalimderdiń elektrondy kúndelik toltyrý úshin dala kezip júrgen sýretine pikir bildirgen edi.