Qazyǵurtta «Anaǵa taǵzym» jáne «Bozdaqtar» eskertkishi ashyldy

QAZYǴURT. QazAqparat – Túrkistan oblysynyń Qazyǵurt aýdanynda «Anaǵa taǵzym» jáne «Bozdaqtar» eskertkishi boı kóterdi. Qarabastaý aýylynda ótken saltanatty sharaǵa aýdan ákimi Tólegen Telǵaraev qatysyp, adaldyqtyń sımvolyndaı bolǵan eskertkishterdi eldiń búgingi urpaqtary úlgi tutýy kerektigin aıtty, dep habarlaıdy QazAqparat tilshisi.

Qoǵamdaǵy, otbasyndaǵy ana mártebesin kóterý maqsatynda boı kótergen «Anaǵa taǵzym» eskertkishiniń bıiktigi 11 metr bolsa, maıdanda qaza bolǵan bozdaqtardy eske alý úlgisi retinde salynǵan ekinshi eskertkishtiń bıiktigi - 4,5 metr. «ART-Qurylys» jaýapkershiligi shekteýli seriktestigi qurylysyn júrgizgen bul qos tas músinge jalpy 50 mıllıon teńge qarajat jumsalǵan.

Bozdaqtar rýhyna arnalǵan eskertkishtiń ashylý saltanatynda aýyl aqsaqaldary el tynyshtyǵy, urpaq amandyǵy, beıbit ómir úshin keýdesin oqqa tosqan babalar rýhyna máńgilik taǵzym etti. Óskeleń urpaq boıyna patrıottyq tárbıeniń qalyptasýyna sep bolatyn nysanǵa aýdan zııalylary gúl shoqtaryn qoıyp, ata-baba rýhyna taǵzym jasady.

«Bul eskertkishter Elbasy ekshegen «Rýhanı jańǵyrý» baǵdarlamasy negizinde qolǵa alynyp otyr. Kemeldengen eldiń týǵan tarıhy men ata-baba dástúrin bilý, anaǵa qurmet – jórgekte jatqan jerinen bastalýy tıis. Igi iske uıytqy bolǵan kásipkerdiń isi kópke úlgi», -dedi saltanatty sharaǵa qatysqan QR Qurmetti zańgeri Ábdiqadir Kárim.

Shara sońynda eskertkishti ornatýǵa atsalysqan azamatqa qurmet kórsetildi. Baba rýhyna arnap as berilip, quran baǵyshtaldy. Aýyl azamattary demeýshilik jasaǵan kásipkerge shapan jaýyp, at mingizdi.