Qazyǵurtta 200-ge jýyq qonaq shaqyryp, qyz uzatqan otbasy aıyppul tóleıdi

QAZYǴURT. QazAqparat - Túrkistan oblysynyń polıtseıleri karantın talaptarynyń saqtalýyn qadaǵalaý maqsatynda kúndelikti is-sharalar júrgizip jatyr, dep habarlaıdy QazAqparat.

Karantın talaptarynyń saqtalýyn qadaǵalaý maqsatynda, Túrkistan oblysynda kúndelikti turaqty túrde is-sharalar júrgizilýde.

Osy tusta Qazyǵurt polıtsııa qyzmetkerleri reıdke shyqty. Olar aýdandaǵy tamaqtaný oryndarynda, saýda úılerinde, azyq-túlik dúkenderinde, adam kóp shoǵyrlanatyn oryndarda karantın talaptarynyń saqtalýyn qatań túrde qadaǵalaýda.

Atalǵan shara barysynda, adam kóp jınalatyn aımaqtarda medıtsınalyq betperdesiz júrgen 2 azamat anyqtaldy.

Olarǵa qatysty túsindirme jumystary júrgizilip, QR ÁQBtK 425-baby boıynsha tıisti materıaldar toptalyp, qujattar zańdy sheshim qabyldaý úshin Qazyǵurt aýdandyq SEBB-ge jiberildi.

Sonymen qatar karantın rejımin buzyp, kópshilikti jınap, toı jasaýshylardyń da sany azaıar emes.

Biri 100-den astam adamdy jınap toı jasasa, endi biri 200-ge jýyq týystaryn shaqyryp, qyzyn uzatyp jatyr.

Olarǵa qatysty QR ÁQBtK 425-baby boıynsha is-qujattar jınaqtalyp, zańdy sheshim qabyldaý maqsatynda SEBB-ge joldandy.

Osy tusta aıta keter jaıt, Qazyǵurt aýdany aýmaǵynda mobıldi toptar QR ÁQBtK 425-baby boıynsha jyl basynan beri karantın talaptaryn buzýdyń 61 jaıtyn anyqtady.

Onyń ishinde kókpar oıynyn uıymdastyrý boıynsha 10 jaıt tirkelse, kópshilikti jınap toı-jıyn uıymdastyrýǵa qatysty 18 derek, qalǵan 33 jaıt - maskasyz júrgen turǵyndar.

Túrkistan oblysy polıtsııa departamenti karantın rejımi kezinde bekitilgen talaptardy oryndamaı, turǵyndardyń densaýlyǵyna qaýip tóndiretin azamattar tıisti jazaǵa tartylatynyn eskertedi.

Sondyqtan bas sanıtar dárigerdiń qaýlysynyń talaptaryn qatań saqtaý, betperde kııý jáne araqashyqtyqty saqtaýdy esten shyǵarmańyz.