QazUÝ stýdentteri el jastaryna úndeý joldady

ALMATY. QazAqparat - Memleket basshysynyń «Táýelsizdiktiń urpaqtary» atty Jastar jylynyń ashylýynda aıtylǵan oılary ál-Farabı atyndaǵy QazUÝ-da ótken stýdenttik forýmda talqylandy.

Ózderi bastama tanytqan jetekshi ýnıversıtettiń stýdentteri Qazaqstan jastaryn «Jastardyń shyǵarmashylyǵy men kúsh jigeri - elimizdiń ınnovatsııalyq damýy úshin» ulttyq jastar qozǵalysyna qosylýǵa shaqyrdy.

Bir alańda 2 myńnan astam jastar - stýdenttik uıymdardyń kóshbasshylary, jas ǵalymdar, startaperler, kásipkerler men eriktiler jınaldy. Pikir jáne tájirıbe almasý Prezıdent aıtqan barlyq negizgi baǵyttar boıynsha órbidi. Talqylaýdyń basty baǵyty bilim ekonomıkasyn qurýǵa jastardy qatystyrý joldaryn tabýǵa arnaldy.

Forýmdy ashqan ál-Farabı atyndaǵy QazUÝ rektory akademık Ǵalym Mutanov: «Táýelsizdik jyldarynda Qazaqstanda jańa formatsııanyń jas tolqyny ósti. El Prezıdenti men memleket onyń qalyptasýyna jáne damýyna kóp úles qosty. Memleket táýelsizdigin nyǵaıtýdyń jaýapkershiligi men ıntellektýaldy ult qalyptastyrý jáne álemdik deńgeıde ultymyzdyń básekege qabilettiligin arttyrýda jastarǵa asa zor jaýapkershilik pen úlken úmit júkteledi», - dedi.

Memleket basshysy jastar aldyna qoıǵan tapsyrmalardy oryndaýǵa stýdentter qandaı úles qosa alatyndary jaıly óz oılaryn ortaǵa saldy. Sondaı-aq olar 4.0 ındýstrııasyn qurýǵa baǵyttalǵan jeke ıdeıalary men ınnovatsııalyq jobalaryn usynyp, startaptardy iske asyrý tájirıbelerimen bólisti.

Forým jumysynyń qorytyndysy retinde «Jastardyń shyǵarmashylyǵy men kúsh jigeri - eldiń ınnovatsııalyq damýy úshin» ulttyq jastar qozǵalysyn qurý jónindegi bastamasy usynyldy. Stýdentter el jastaryn qozǵalysqa belsendi qatysýǵa jáne bar bilimin, qabiletin, shaǵyrmashylyǵyn kreatıvti ıdeıalardy, jobalardy jáne ınnovatsııalardy jasaýǵa jáne engizýge arnaýǵa shaqyrdy.

«Qazaqstan Jastar jylyna aıaq basty, bul - Elbasynyń el bolashaǵy jas urpaqqa degen úlken ári erekshe qamqorlyǵynyń kórinisi. Memleket biz úshin bir nárse jasap beredi dep kútip otyrýdyń esh qajeti joq. «Men elim úshin ne isteı alamyn?» degen suraqty árbir adam ózine qoıýy tıis», - delingen úndeýde.

Úndeýde kórsetilgendeı, jyl saıyn elimizde joǵary oqý oryndaryn 200 myńǵa jýyq túlek bitirip shyǵady. Osy rette olar ómirge qanshalyqty bilim qorymen qadam basady jáne azamattyq ustanymy qanshalyqty belsendi degen suraq týady. Mańyzdysy sol olar qajetti quzirettilikke qol jetkizgen soń jumyssyzdardyń qataryn emes, ózderi jumys oryndaryn qura alǵan azamattardyń biregeıi bolý tıis. Sebebi elimizdiń erteńgi gúldenýi olardyń Qazaqstan qoǵamynyń damýyna qosqan úlesine tyǵyz baılanysty.

Elbasy aıtqandaı, Qazaqstanda ǵylym men ınnovatsııany kóteretin jáne 4.0 ındýstrııany quratyn kreatıvti urpaq kerek. Tek sol kezde ǵana eldiń jahandyq tehnologııalar trendine saı damýyn jáne álemdik keńistiktegi onyń básekege qabilettiligin qamtamasyz ete alamyz.

Tájirıbe kórsetip otyrǵandaı, jastardy bilim ekonomıkasyn damytýǵa tartý jańa ıdeıalardy, oılar men ınnovatsııalardy anyqtaýǵa jáne qoldaýǵa baǵyttalǵan alańdardy qurýǵa yqpal etetindigi qujatta aıtylǵan.

Intellektýaldy-shyǵarmashylyq áleýetti yntalandyrý maqsatynda jáne talantty jastardy anyqtaý úshin ál-Farabı atyndaǵy Qazaq ulttyq ýnıversıtetinde 6 jyldan beri «Meniń Qazaqstannyń ınnovatsııalyq damýyna qosqan naqty úlesim» úzdik jas ǵalym, úzdik stýdenttik startapqa, «Óz elimniń gúldenýi úshin men ne isteı alamyn?» atty úzdik esse men poetıkalyq shyǵarmaǵa, «Máńgilik el - meniń muratym» úzdik patrıottyq ánderge arnalǵan QR Birinshi Prezıdenti kúninde qorytyndysy shyǵarylatyn baıqaýlar jobasy júzege asyrylyp keledi.

«Ulttyq jastar qozǵalysyn qalyptastyrý maqsatyndaǵy atalmysh tájirıbe negizinde «Jastardyń shyǵarmashylyǵy men kúsh jigeri - elimizdiń ınnovatsııalyq damýy úshin» uranymen joǵaryda atalǵan baıqaýlardy respýblıkanyń barlyq jastary arasynda jyl saıyn ótkizý tájirıbesin qarastyrýdy usynamyz», - delingen QazUÝ stýdentteriniń úndeýinde.

Forým qatysýshylary ulttyq jastar qozǵalysy Qazaqstan stýdentteriniń jalpy qoldaýyna, Qazaqstan kóleminde júıeli negizde júzege asyrylýy jastardyń jańa ıdeıalarynyń, jobalary men shyǵarmashylyq bastamalarynyń turaqty aǵynyn qamtamasyz etetinine, onyń kásipkerlik daǵdylaryn qalyptastyrýǵa yqpal jasap, bolashaqta jeke ınnovatsııalyq kásiporyndaryn qurýǵa yntalandyratynyna senim bildirdi.

«Eger bul jobaǵa árbir ýnıversıtet, kásiporyn jáne aımaq qosylsa, onda ınnovatsııalyq jastar qozǵalysy shyn máninde jappaı óris alyp, bilim ekonomıkasynyń damýyna zor yqpal etetin yntalandyrýshy kúsh bolady. Biz jastardyń eń úzdik bastamalary memlekettik uıymdardyń barlyq deńgeıindegi tıisti resýrstardan qoldaý tabatynyna senemiz! Osyǵan qaraı biz úlken yntamen Prezıdenttiń tapsyrmasyn qolǵa ala otyryp, talantty jastardyń ıdeıalary men startaptaryna kómek kórsetý maqsatynda arnaıy grant tabystaıtyn bıznes-qurylymdarǵa usynys tastaımyz. Bizdiń usynysymyz ary qaraı keń kólemde júzege asyrylsa, onda ol qoǵamda qolaıly ınnovatsııalyq orta jasaýǵa ári jastardyń kúsh jigeri men shyǵarmashylyǵynyń jasampaz kúshke aınalýyna múmkindik beredi. Qazaqstannyń eń damyǵan 30 eldiń qataryna qosylýy tolyǵymen bizge baılanysty! Elimizdiń bolashaǵy - bizdiń qolymyzda», - dep shaqyrdy QazUÝ stýdentteri.

Forým qatysýshylary óz taraptarynan jasalǵan úndeý men ulttyq jastar qozǵalysy Qazaqstan stýdentterinen jalpyǵa ortaq qoldaýǵa ıe bolady dep úmit artty.