QazUÝ men Eýrazııa ulttyq ýnıversıteti úshin jańa ǵımarattar salynady
«Bıýdjet kodeksindegi «grant» uǵymynyń aıasyn keńeıtý qajet. Ǵylymı zertteýge qajetti qural-jabdyq alýǵa jáne onyń ınfraqurylymyn damytýǵa arnalǵan qarjy esh kedergisiz bólinýi kerek.
Jalpy elimizdegi joǵary bilim salasyn damytýǵa tozyǵy jetken ınfraqurylym da bóget bolyp otyr. Memlekettik joǵary oqý oryndarynyń ǵımarattary eskirgen. Kóbi jarty ǵasyrdan astam ýaqyt buryn salynǵan. Bulardyń ishindegi eń jańa degeni – 1982 jyly boı kótergen Aqtóbe memlekettik ýnıversıteti. Osy oraıda meniń tapsyrmammen ál-Farabı atyndaǵy Qazaq ulttyq ýnıversıteti jáne L.Gýmılev atyndaǵy Eýrazııa ulttyq ýnıversıteti úshin jańa ǵımarattar, ıaǵnı kampýstar salynady.
Basqa da joǵary oqý oryndarynyń materıaldyq-tehnıkalyq bazasyn jańǵyrtý kerek. Ýnıversıtetterdiń jáne zertteý ortalyqtarynyń eskirgen zerthanalaryn birtindep qalypqa keltirý qajet», - dedi Memleket basshysy.
Sondaı-aq, Prezıdent myqty ýnıversıtetterdiń kóbi Astana men Almatyda ornalasýy ishki kóshi-qon júıesiniń buzylýyna jáne óńirlerdegi kadr tapshylyǵyna ákep soqtyratynyn atap ótti.
«Medıtsına ǵylymynda nátıjeli izdenister bar. Qaterli isikke qarsy otandyq ǵalym Dos Sarbasov oılap tapqan biregeı preparat – sonyń jarqyn mysaly. Mundaı jobalardy jan-jaqty qoldaý kerek.
Ǵalym Sarbasovtyń Qazaqstanda klınıkalyq zertteýler habyn qurý jónindegi usynysyn eskergen jón dep sanaımyn. Elimizdegi joǵary oqý oryndary arasynda óńirlik teńsizdik baıqalady. Myqty ýnıversıtetterdiń kóbi Astana men Almatyda ornalasqan. Bul ishki kóshi-qon júıesiniń buzylýyna jáne óńirlerdegi kadr tapshylyǵyna ákep soqtyrady.
Ǵylym men joǵary bilimniń birtutas damýyn qamtamasyz etý úshin buǵan deıin 15 óńirlik jáne 5 pedagogıkalyq joǵary oqý ornynyń bazasynda Akademııalyq basymdyq ortalyqtaryn qurýdy tapsyrǵan edim. Úkimet joǵary oqý oryndarynyń zertteýshilik baǵytyn damytyp, baǵdarlamalyq-nysanaly qarjylandyrý arqyly osy jobany kezeń-kezeńimen júzege asyrýy kerek. Mundaı ortalyqtar kóptegen elde tabysty jumys isteıdi. Bul elderdiń ekonomıka qurylymynda ǵylymı ınnovatsııa men bilim berý qyzmetteri eksportynyń úlesi zor.
Óńirlik ýnıversıtetterdiń ǵylymı áleýetin jas ǵalymdar kúsheıte alady. Muny damyǵan memleketterdiń tájirıbesi kórsetip otyr. Sebebi olar mobıldi ári ózgeristerge tez beıimdeledi. Olardy óńirlik joǵary oqý oryndarynda eńbek etýge jáne zertteý jumystaryn júrgizýge yntalandyratyn pármendi mehanızmder qajet. Jalpy, Úkimet el aýmaǵyndaǵy ǵylymı ortalyqtar men ınstıtýttardy qoldap, damytý úshin qajetti sharalardyń barlyǵyn qabyldaǵany jón», - dedi Prezıdent.