QazUÝ-da Táýelsizdik kúni qarsańynda qysqy baq ashyldy
Іs-sharaǵa qoǵam jáne mass-medıa ókilderi, kórnekti ǵalymdar, belgili túlekter, ýnıversıtet oqytýshylary men stýdentteri qatysty. Rektor Ǵalym Mutanov ýnıversıtet ujymy men qonaqtardy elimizdiń basty ulttyq merekesimen quttyqtaı otyryp, Táýelsizdik el kóshbasshysy Nursultan Nazarbaevtyń jetekshiligimen senimdi alǵa jyljyp kele jatqan halyqtyń eń uly jetistigi ekendigin atap ótti. Elbasynyń strategııalyq baǵyty qazaqstannyń damý modeliniń jeńisin aldyn ala aıqyndap, elimizdiń saıası, ekonomıkalyq jáne áleýmettik salalarynda túbegeıli ózgeristerge qol jetkizýge múmkindik berdi. Táýelsiz Qazaqstan tarıhynyń jańa kezeńi - qoǵamdyq sanany jańartý men rýhanı jańǵyrý. Bul baǵytta bizder úshin «Rýhanı jańǵyrý» baǵdarlamasy men Prezıdenttiń «Uly dalanyń jeti qyry» atty maqalasy basty baǵdar.
«Qazaqstan táýelsiz memleket retinde álemge tanymal jáne halyqaralyq arenada úlken rol atqarady. Eldiń 27 jyldyq Táýelsizdigi barysynda qol jetkizilgen jetistikterde árbir qazaqstandyqtyń eńbegi, onyń ishinde QazUÝ ujymynyń úlesi de bar. Biz bolashaqqa senim artamyz, sondyqtan da el Prezıdentiniń ıdeıasyn is júzine asyrý úshin aıanbaı bar kúshimizdi salamyz», - dep atap ótti akademık Ǵalym Mutanov.
Sondaı-aq, ol JOO-nyń jetistikteri men tabystaryna toqtalyp, ýnıversıtet ujymyna belsendi atqarǵan eńbegi úshin jáne QazUÝ men Qazaqstannyń joǵary bilim berý júıesin damytý isine qosyp jatqan úlesi úshin úlken alǵysyn bildirdi. QazUÝ jahandyq ǵylymı-bilim berý reıtıngterinde qarqyndy alǵa ilgerileýde ekendigi atap ótildi. Halyqaralyq bedeldi «QS» reıtıngisinde ýnıversıtet álemniń eń úzdik JOO-dary arasynda 220 orynda. Mereke qarsańynda «Academic Ranking of World Universities-European Standard» («ARES») atty bedeldi eýropalyq reıtıngisiniń zertteý málimeti boıynsha QazUÝ-dyń Qazaqstannyń joǵary oqý oryndarynyń arasynda kóshbasshylyǵy men álemdik básekege qabilettiligin dáleldegeni týraly aqparat ujym úshin jaǵymdy jańalyq boldy. Ol óziniń «AA» kórsetkishteri boıynsha eýropalyq jetekshi ýnıversıtetterdiń qataryna kirip, basqa qazaqstandyq JOO-dyń anaǵurlym aldynda tur.
Sonymer birge, rektor QazUÝ-dyń «Scopus» halyqaralyq derekter bazasyna kiretin joǵary reıtıngti basylymdarda jarııalanǵan maqalalar sany boıynsha Qazaqstan kóshbasshysy bolyp tanylǵandyǵyn atap ótti. BUU, ıÝNESKO, COMSATS, IYU, QS jáne t.b. bedeldi halyqaralyq uıymdar ýnıversıtettiń senimdi seriktesteri retinde QazUÝ-da álemdik deńgeıdegi is-sharalar ótkizýde.
Qazirgi ýaqytta ýnıversıtette ǵarysh tehnologııalarynyń klasteri qalyptastyrylýda. Táýelsizdik kúni qarsańynda Kalıfornııa shtatyndaǵy (AQSh) ǵarysh aılaǵynan Ilon Mask «SpaceX» kompanııasy ál-Farabı atyndaǵy QazUÝ ǵalymdary jasaǵan «Al-Farabi-2» qazaqstandyq nanospýtnıkti sátti ushyrdy.
Bıylǵy jyly 10 myńnan astam stýdent QazUÝ-ǵa túsip, ýnıversıtet oqý granttarynyń sany boıynsha elimizdiń joǵary oqý oryndary arasynda absolıýtti kóshbasshy atandy.
Saltanatty sharanyń barysynda úzdik oqytýshylar men ýnıversıtet qyzmetkerlerine qurmet gramotalary tabystalyp, QazUÝ-dyń kórkemóner ujymy men QR halyq ártisi Murat Serkebaev jetekshilik jasaıtyn Almaty qalasy ákiminiń orkestri jáne de Qazaqstannyń eńbek sińirgen qaıratkeri Jámıla Serkebaevanyń qatysýymen merekelik kontsert ótkizildi. Bul osy keshtiń tamasha sátine aınaldy.