QazUÝ tsıfrlyq dáýir synyna jaýap berýge daıyn - Ǵalym Mutanov
Ýnıversıtet ujymy tsıfrlyq ekonomıka jaǵdaıyndaǵy adamı kapıtaldyń qalyptasýyna baǵyttalǵan sheshýshi qadamdardy baǵdarlady.
Ýnıversıtet qoǵamdastyǵy músheleri Elbasy Joldaýyn Qazaqstannyń odan ári jańǵyrýy boıynsha júıeli sharalardy aıqyndap bergen biregeı baǵdarlama retinde úlken qulshynyspen jáne yqylaspen qabyl aldy.
QazUÝ rektory Ǵalym Mutanovtyń aıtýynsha, ýnıversıtetter adamı kapıtaldyń qalyptasýyndaǵy mańyzdy sýbektiler retinde onyń jańa sapasyn qamtamasyz etýi kerek jáne qazaqstandyq qoǵam jańǵyrýynyń qozǵaýshy kúshine aınalýy tıis.
Osy baǵytta oqý orny «Al-Farabi University smart city» jobasy aıasynda jańa urpaq ýnıversıtetiniń úlgisin júzege asyrýda.
«Tórtinshi ónerkásiptik revolıýtsııa - álemde qalyptasqan trend. Osy ýaqytqa deın qoldanyp kelgen qondyrǵy, stanoktar ózgerip jańa deńgeıge shyǵyp jatyr. Ýaqyt talabynan shyǵa bilý mańyzdy. Qazaq Ulttyq ýnıversıteti aldyńǵy qatarly ulttyq ýnıversıtet retinde birqatar joba júzege asyryp jatyr. Bul eki joba da halyqaralyq deńgeıde joǵary baǵasyn aldy. Elbasynyń qoldaýymen joǵary deńgeıdegi, quny 10 mln dollar bolatyn sýperkompıýter alyp otyrmyz. Bul tehnıka bıyl alǵashqy jartyjyldyqta keledi. Qytaı respýblıkasynyń granty negizinde. Osynyń negizinde ІT tehnoparki jasalady. Jańa ortalyq búkil respýblıka boıynsha kúrdeli úlken derekter boıynsha jasandy ıntelllekt jobasy retinde joǵary deńgeıge kóteriletinine senimdimiz. Biz óz tarapymyzdan úlken oryn daıyndap jatyrmyz», - dedi ol.
ІT-tehnoparkinde ǵylymı zerthanalar jumysy, dızaın zerthanalary, 3Dprıntıng, ınnovatsııalyq sheberhanalar, kovorkıng-ortalyq pen «IGeneration» bıznes-ınkýbator shoǵyrlanǵan biryńǵaı klaster ornalasatyn bolady. Bul óndiristik ındýstrııanyń ýnıversıtettermen joǵary óndiristik aqparattyq-kommýnıkatsııalyq tehnologııalardy qurastyrýǵa, Sılıkon aımaq syndy joǵary tehnologııalar aımaǵyn qurýǵa múmkindik beredi.
Rektordyń aıtýynsha, bıyl ekinshi semestrden bastap jeke ІT fakýlteti quryldy.
Jańa fakýltette Sýperkompıýterlik tehnologııa bazasynda málimetterdi óndeý ortalyǵy, Big DATA salaaralyq zerthanasy jáne Blokcheın zerthanasy qarastyrylǵan. Qazaqstannyń dástúrli bazalyq ónerkásip ındýstrııasyna iri ІT-kompanııalardy jáne sheteldik JOO-lar - seriktesterdi bilim berý úderisine tarta otyryp, «mol málimettermen» almasyp ІT-mamandardy daıyndaý óndiristik úrdisterdi avtomattandyrý, robottandyrý, jasandy ıntellekt elementterin qoldaný salalary boıynsha júzege asyrylady. Joldaýdy júzege asyrýdaǵy ýnıversıtettiń jol kartasy aıasynda 3D-prıntıng, onlaın-saýda, mobıldi bankıng, densaýlyq saqtaý jáne bilim berýdegi tsıfrly qyzmet - keleshegi zor ónerkásipterdi damytýǵa kadrlardy daıyndaýǵa baǵyttalǵan jańa bilim berý baǵdarlamalaryn engizý qarastyrylǵan. Bul tsıfrlyq dáýir jaǵdaıynda eldiń jańa ındýstrıalızatsııalaný qajettiligine bilim berý júıesin beıimdeýge qosqan QazUÝ-dyń naqty úlesi bolmaq.
QazUÝ alǵash ret TMD kóleminde «Tsıfrlyq Qazaqstan» respýblıkalyq baǵdarlamasy aıasynda tsıfrlyq ýnıversıtet úlgisin jasady jáne JOO qyzmetin avtomattandyrýda bulttyq tehnologııalardy, kampýs ınfraqurylymyn basqarýda Smart tehnologııalardy ári taldamaly júıe qalyptastyrý úshinBig Data tehnologııalaryn engizdi.
Baǵdarlamalyq jasaqtamanyń iri óndirýshisi - «Microsoft» kompanııasynyń joǵary bilim berýdiń IT tuǵyrnamasy damýynyń ınnovatsııalyq vektoryn qalyptastyrýda áriptes retinde QazUÝ-dy tańdaǵan.
QazUÝ Qazaqstanda tuńǵysh ret jappaı ashyq onlaın kýrstaryn bastady. Bul óz kezeginde Ashyq bilim berýdiń ulttyq tuǵyrnamasyn iske qosýǵa múmkindik berdi. Atalǵan tuǵyrnama qazaqstandyq JOO-lardyń básekege qabilettiligin arttyrýǵa yqpal etedi.
«E-kampýs» jobasy bazasynda ýnıversıtettiń tehnologııalyq tuǵyrnamasynyń qalyptasýyna «Hewlett-Packard», «Cisco», «Konisa Minolta», «Fujitsu», «Samsung», «Alcatel», «Kasperskıı zerthanasy», Microsoft, Intel, Huawei syndy ǵylymı-bilim berý ortalyqtary tyń qarqyn berdi. QHR Ǵylym akademııasynyń Qashyqtyqtan zondtaý jáne tsıfrlyq Jer ınstıtýtymen (RADI) birge Jerdi zondtaýdyń tsıfrlandyrý ortalyǵy qurylǵan. Gonkong polıtehnıkalyq ýnıversıtetimen birlese Tehnoloft Indýstrııa 4.0 - ǵylymı-bilim berý zerthanasyn qurý boıynsha jumys bastaldy.
Prezıdent atap ótkendeı, tsıfrlyq dáýir jaǵdaıynda eldiń jańa ındýstrııalanýynda basty mańyzdylyq - kadrlyq qamtamasyz etý bolmaq. Osyǵan oraı QazUÝ-da aǵymdaǵy oqý jylynyń ekinshi semestrinen bastap-aq aqparattyq tehnologııalar fakýlteti quryla bastaıdy.