QazUAZÝ laýazymdy tulǵalary urlyq jasaǵany úshin sottaldy

<p>ALMATY. KAZINFORM - Almaty qalasynyń prokýratýrasy Qazaq ulttyq agrarlyq zertteý ýnıversıtetiniń (budan ári - Ýnıversıtet) jalǵan tuqym egý jáne egý oryndaryn óńdeý jolymen bıýdjet qarajatyn jymqyrý faktisi boıynsha sotqa deıingi tergep-tekserýdi aıaqtady.</p>

Buǵan deıin Bas prokýratýranyń tapsyrmasymen Ýnıversıtettiń qyzmetine tekserý júrgizilgen, onda 2020 jyly Ýnıversıtet jalpy somasy 43,8 mln teńgege qant júgerisiniń tuqymyn, «ammofos» mıneraldy tyńaıtqyshy men ammıakty selıtrasyn satyp alýǵa memlekettik satyp alý týraly 3 shart jasasqany anyqtalǵan.

Tekserý joǵaryda atalǵan taýarlardyń is júzinde jetkizilmegenin, aqsha qarajatynyń qolma-qol aqshaǵa aınaldyrylǵanyn kórsetti.

№2 Medeý aýdandyq sotynyń úkimimen Ýnıversıtettiń «Saımasaı» oqý-tájirıbelik sharýashylyǵynyń dırektory Qylmystyq kodekstiń 189-baby 4-bóliginiń 2-tarmaǵynda kózdelgen qylmysty jasaǵany úshin kináli dep tanylyp, 7 jylǵa shartty túrde bas bostandyǵynan aıyrýǵa sottaldy. Zalal tolyq kólemde óteldi.

Úkim zańdy kúshine endi.

Osyǵan deıin Sybaılas jemqorlyqqa qarsy is-qımyl agenttiginiń jemqorlyq jaıly habarlaǵan azamattarǵa 14,7 mln teńgege deıin syıaqy beriletini týraly habarlaǵanyn jetkizgenbiz.