«Qaztransoıl» Germanııaǵa munaı jetkizý úshin «Transneft» kompanııasyna qazaqstandyq munaıdy tapsyrdy

ASTANA. QazAqparat - «QazTransOıl» AQ Germanııaǵa munaı jetkizý úshin «Adamova zastava» munaı tapsyrý pýnktiniń baǵyty boıynsha «Transneft» JAQ magıstraldyq munaı qubyrlary júıesine 20 myń tonna qazaqstandyq munaıdy tapsyrýdy 25 aqpanda júzege asyrdy.

Bul týraly QazAqparat «QazTransOıl» AQ baspasóz qyzmetine silteme jasap habarlaıdy.

«2022-shi jyldyń jeltoqsan aıynda «QazTransOıl» AQ 2023 jyly 1,2 mln tonna qazaqstandyq munaıdy «Transneft» JAQ magıstraldy munaı qubyrymen «Adamova zastava» munaı beketi arqyly Germanııaǵa jetkizýge ótinim bergen bolatyn. Munaıdyń bul tranzıti Qazaqstan Respýblıkasy men Reseı Federatsııasy úkimeti arasyndaǵy 2002 jylǵy 7 maýsymdaǵy kelisim sheńberinde júzege asady»,-delingen habarlamada.

Osyǵan deıin QazTransOıl Germanııaǵa jetkiziletin munaıdy qabyldaı bastaǵanyn jazǵan bolatynbyz.